Mkupita kwandaŵi Ayisalayeli paŵaliji m’cipululu, Kola, Datani ni Abilamu, soni ŵandu ŵane ŵakwana 250 ŵamjimucile Mose. Jemanjajo ŵatite kwa Mose, ‘Sambano tupesile namwe! Ngamkusosekwasoni kuŵa jwakutulongolela, soni Aloni ngakusosekwa kuŵa jwamkulungwa jwa ŵambopesi. Yehofa ali ni wosopewe, ngaŵa mmwejo ni Alonipe.’ Yeleyi yamtumbilikasisye Yehofa. Jwalakwe ŵaweni jemanjaji kuŵa ŵakwimucila.

M’yoyo Mose ŵamsalile Kola ni ŵakumkuya ŵakwe kuti, ‘Ayice ku citenti cakulambilila malaŵi, akajigale yida yakutinicisya mbopesi ni akaŵicemo mbopesi. Yehofa cacitulosya mundu jwamsagwile.’

Kaneko lisiku lyakuyicisya, Kola soni acalume 250 ŵala ŵajawile ku citenti cakulambilila kukusimana ni Mose. Ali ayice kweleko jemanjajo ŵatinisye mbopesi mpela muŵatendelaga ŵambopesi. Nambo kaneko Yehofa ŵamsalile Mose ni Aloni kuti, ‘Atyoce kwa Kola ni acalume ŵakwe.’

Atamose kuti Kola ŵapite ku citenti cakulambilila kukuwonegana ni Mose, nambo Datani ni Abilamu yalumo ni maŵasa gawo ŵakanile. Yehofa ŵasalile Ayisalayeli kuti atyoce ku masakasa ga Kola, Datani soni Abilamu. Mwangacelewa, Ayisalayeli ŵatyosile. Nambo Datani ni  Abilamu yimpepe ni maŵasa gawo ŵajimi kusa kwa masakasa gawo. Mwangajembeceya pasi paŵalwice ni kwamila wosopewo. Moto wakutyocela kwinani wamjocile Kola soni acalume 250 ŵaŵaliji ku citenti ŵala.

Kaneko Yehofa ŵamsalile Mose kuti, ‘Mjigale ndodo kutyocela kwa jwakulongolela jwalijose jwa lukosyo lulilose lwa Ayisalayeli ni mjilembe lina lya jwakulongolelajo. Nambo ndodo ja lukosyo lwa Lefi, mjilembe lina lya Aloni. Msiŵice ndodosyo m’citenti cakulambilila, ndodo ja mundu jusagwile cijisipuce maluŵa.’

Lisiku lyakuyicisya, Mose ŵajigele ndodo syosope ni ŵalosisye acimlongola ŵala. Ndodo ja Aloni jasipwice maluŵa soni yisogosi yakuwoneka mpela matowu. Pelepa Yehofa ŵalosisye kuti amsagwile Aloni kuŵa jwamkulungwa jwa ŵambopesi.