Ka máan kʼiineʼ le tiaʼan kaʼach le israelitaʼob teʼ desiertooʼ, Coré, Datán, Abiram yéetel uláakʼ 250 máakoʼobeʼ líikʼoʼob tu contra Moisés. Letiʼobeʼ tu yaʼaloʼobtiʼ: ‹¡Tsʼoʼok a náaksikeʼex k-óol! ¿Baʼaxten teech tsʼaʼanech a beet a nojchil ichiloʼon? ¿Baʼaxten Aarón tsʼaʼan xan u beet u nojchil le sacerdoteʼoboʼ? Maʼ chéen ta wéeteleʼex yaan Jéeobaiʼ, tiaʼan xan t-éeteleʼ›. Jéeobaeʼ maʼ maʼalob tu yuʼubil le baʼax tu yaʼaloʼoboʼ. Letiʼeʼ tu yilaj bey líikʼoʼob tu contraeʼ.

Moisés túuneʼ tu yaʼalaj tiʼ Coré yéetel tiʼ le máaxoʼob tsaypachtikoʼ: ‹Koʼoteneʼex sáamal teʼ tabernaculooʼ, taaseʼex nuʼukuloʼob tuʼux ku tsʼaʼabal chúuk yéetel incienso. Jéeobaeʼ yaan u yeʼesik máax ken u yéeye›.

Ka sáaschajeʼ Coré yéetel le 250 máakoʼoboʼ bin u yiloʼob Moisés teʼ tabernaculooʼ. Teʼeloʼ joʼopʼ u tóokikoʼob incienso jeʼex u beetik le sacerdoteʼoboʼ. Jéeobaeʼ tu yaʼalaj tiʼ Moisés yéetel tiʼ Aarón: ‹Náachkuntabaʼex tiʼ Coré yéetel tiʼ le máaxoʼob tsaypachtikoʼ›.

Coreeʼ bin teʼ tabernáculo tuʼux yaan Moisesoʼ, chéen baʼaleʼ Datán, Abiram yéetel u láakʼtsiloʼobeʼ maʼ tu yóotoʼob biniʼ. Jéeobaeʼ tu yaʼalaj tiʼ le israelitaʼoboʼ: ‹¡Tselabaʼex tu baʼpach u yotoch Coré, Datán yéetel Abiram!›. Le israelitaʼoboʼ tu séebaʼanil tu náachkuntubaʼob. Datán,  Abiram yéetel u láakʼtsiloʼobeʼ pʼáatoʼob waʼatalil tu jool u yotochoʼob. Chéen ka jeʼepaj le luʼumoʼ ka tu lukʼaj le máakoʼob maʼ tu yuʼuboʼob tʼaanoʼ. Teʼ tabernáculo xanoʼ éem kʼáakʼ desde teʼ kaʼanoʼ ka tu tóokaj Coré yéetel le 250 máakoʼoboʼ.

Ka tsʼoʼokeʼ Jéeobaeʼ tu yaʼalaj tiʼ Moisés: ‹U nojchil cada tribueʼ u taas u xóolteʼob. Tsʼíibt u kʼaabaʼ cada juntúul yóokʼol le xóolteʼ ken u taasoʼ. Chéen baʼaleʼ tiʼ u tribu Levíeʼ yaan a tsʼíibtik u kʼaabaʼ Aaroniʼ. Láaj tsʼáaʼob ichil le tabernaculooʼ. U xóolteʼ le máax ken in yéeyoʼ yaan u loolankil›.

Ka sáaschajeʼ Moiseseʼ tu láaj jóoʼsaj le xóolteʼoboʼ ka tu yeʼesaj tiʼ u nojchil cada tribu. U xóolteʼ Aaroneʼ loolnaji yéetel yaan kaʼach u almendrailoʼob tsʼoʼok u kʼantaloʼob. Bey tu yeʼesil Jéeoba tsʼoʼok u yéeyik Aarón utiaʼal u beetik u nojchil le sacerdoteʼoboʼ.