Israel bi ɔmɛ nyɛɛ nga a nɔ maa pee jeha 40. A kɛ mahi fuu hwu ta nɛ a ye a nɔ. A ya to si ngɛ Moab zugba a nɔ, ngɛ Yɔdan Pa a puje he blɔ. Benɛ a ngɛ lejɛ ɔ, a na kaa a kɛ Si Womi Zugba a he kɛ we. Balak nɛ lɛ ji Moab bi ɔmɛ a matsɛ ɔ ye gbeye kaa Israel bi ɔmɛ ma kpɔ e zugba a ngɛ e dɛ. Enɛ ɔ he ɔ, Balak tsɔ kɛ ya tsɛ nyumu ko nɛ a tsɛɛ lɛ ke Balaam ɔ konɛ e ba Moab nɛ e ba gbiɛ Israel bi ɔmɛ.

Se Yehowa de Balaam ke: ‘Koo gbiɛ Israel bi ɔmɛ.’ Enɛ ɔ he ɔ, Balaam yɛ Moab hu. Matsɛ Balak kpale de Balaam ke e ba konɛ e ba gbiɛ Israel bi ɔmɛ, se Balaam yɛ. Kɛkɛ nɛ Mawu de Balaam ke: ‘O kɛ mɛ ma nyɛ maa ya, se nɔ́ nɛ ma de mo ɔ, lɔ ɔ pɛ nɛ e sa kaa o ya de.’

Balaam hi e teji ɔ nɔ nɛ e pue nɔ kɛ ho Moab ya. E ngɛ mi kaa Yehowa de Balaam ke e ko gbiɛ Israel bi ɔmɛ mohu lɛɛ, se Balaam to e yi mi kaa e ma ya gbiɛ mɛ. Benɛ Balaam yaa a, Yehowa bɔfo ko je e he kpo si etɛ sɔuu ngɛ blɔ ɔ nɔ. Balaam nɛ́ bɔfo ɔ, se e teji ɔ lɛɛ, e na bɔfo ɔ. Kekleekle ɔ, teji ɔ gba kɛ je blɔ ɔ nɔ kɛ ho nga a mi ya. Kɛkɛ nɛ teji ɔ ya kpasa gbogbo ko, nɛ e mia Balaam nane kɛ wo gbogbo ɔ he. Nyagbe kulaa a, teji ɔ bu si ngɛ blɔ ɔ kpɛti. Si etɛ ɔ tsuo ɔ, Balaam fiaa teji ɔ tso.

Benɛ Balaam fiaa teji ɔ tso ɔ si etɛne ɔ, Yehowa ha nɛ teji ɔ tu munyu. Teji ɔ bi Balaam ke: ‘Mɛni i pee mo loko o ngɛ mi nɔ́ fiae kikɛ ɔ?’ Balaam he nɔ ke: ‘O pee mi kuasia. I hɛɛ klaate jinɛ i gbe mo.’ Teji ɔ de Balaam ke: ‘O hi ye nɔ jehahi fuu. Anɛ i pee mo nɔ́ ko kaa kikɛ hyɛ lo?’

Kɛkɛ nɛ Yehowa ha nɛ Balaam na bɔfo ɔ. Bɔfo ɔ de Balaam ke: ‘Yehowa bɔ mo kɔkɔ kaa o ko ya gbiɛ Israel bi ɔmɛ.’ Balaam  he nɔ ke: ‘I pee yayami. Ma kpale ye se kɛ ho we mi ya.’ Se bɔfo ɔ de Balaam ke: ‘O ma nyɛ maa ya Moab, se nɔ́ nɛ Yehowa ma de mo ɔ, lɔ ɔ pɛ nɛ e sa kaa o de.’

Anɛ Balaam kase nɔ́ ko kɛ je nɔ́ nɛ ba a mi lo? Dɛbi. Balaam ka kaa e maa gbiɛ Israel bi ɔmɛ si etɛ sɔuu, se ngɛ tsuo mi ɔ, Yehowa ha nɛ e jɔɔ mɛ mohu. Nyagbe kulaa a, Israel bi ɔmɛ kɛ Moab bi ɔmɛ hwu ta, nɛ a gbe Balaam. Kaa Balaam bu Yehowa tue ɔ, jinɛ e ko gbo lo?