Bon ba Israel ba bi tégbaha bebee le 40 ma nwii i ñoñ. Ba bi yémbél ngandak mimpémba mi minkoñ. Nano, ba ntelep i tegep mbok i Môab, i pes likôl i Lom Yordan. Ngéda i nkola le ba jôp i Hisi hi Likak. Kiñe Môab le Balak, a bi kon woñi le a nla nimis nkoñ wé. Jon a bi sébél mut wada le Balam, le a lo i Môab inyu tiihe bon ba Israel.

Ndi Yéhôva a bi kal Balam le: ‘U nlama bé tiihe bon ba Israel.’ Jon Balam a bi tjél ke. Kiñe Balak a bi témb a sébél nye inyu ngélé i nyônôs iba, a bôn ki nye le a’ ti nye to limbe jam a gwé ngôñ. Ndi to hala, Balam a tjél. Mbus, Djob a kal nye le: ‘U nla ke, ndi w’a pot ndigi jam m’a kal we.’

Balam a bi bet ngii jakas jé, a kahal ke i nwelmbok i Môab. A bé hek le a ntiihe bon ba Israel to lakii Yéhôva a bi kal nye le a boñ bañ hala. Mu njel, añgel yada i Yéhôva i pémél nye ngélé aa. Balam a bé tehe bé añgel, ndi jakas jé li bé tehe añgel. Inyu ngélé bisu, jakas li bi nyodi ndugi njel, li jôp bikai. Inyu ngélé i nyônôs iba, jakas li bi hégép libap, li bamda kôô u Balam. Inyu ngélé i nsôk, jakas li nañal isi, i ñem nloñ. Mangéda ma momaa, Balam a bi bép jakas ni kék.

Ngéda Balam a bi bép jakas jé inyu ngélé i nyônôs aa, Yéhôva a boñ le jakas li pot. Jakas li bat Balam le: ‘Inyuki u ngi bébék me?’ Balam a timbhe le: ‘U nwéha me nyuu. Ibale me ban-ga to pansoñ, ki me nol we behee.’ Jakas li kal nye le: ‘Hala a yé ngandak nwii le me yé jakas joñ. Baa me ma boñ we ntén jam unu yôha?’

Mbus, Yéhôva a bi boñ le Balam a tehe añgel. Añgel i kal le: ‘Yéhôva a bi béhe we le u tiihe bañ bon ba Israel.’ Balam a kal  le: ‘Me mboñ béba. Me ga témb i mbai.’ Ndi añgel i kal nye le: ‘U nla ke i Môab, ndi pot ndigi jam Yéhôva a’ kal we.’

Baa Balam a bi ôt biniigana mu jam li? To. Mbus ha, Balam a bi témb a noode tiihe bon ba Israel ngélé aa. Ndi hiki ngéda, iloo le a tiihe bo, Yéhôva a bé a boñ le a sayap bo. Sôk i nsôk, bon ba Israel ba jôs Môab, Balam a nôla. Baa hala a bé bé le a ba loñge inyu Balam ibale a bi bôk ndugi nôgôl Yéhôva?