Te ọ ghi bu ukpo 40 ne Ivbi Izrẹl ya rre uwu ato. Iran khọn ẹvbo nibun mu tan. Nia, te iran ghi rre ato ọghe Moab nọ rre ọkpẹn Ẹzẹ e Jọdan. Ẹghẹ na kha na, te iran khian ghi la Otọ Na Yan Rẹn. Ohan na gha mu e Balak ne ọba ọghe Moab wẹẹ te Ivbi Izrẹl khian vbe do khọnmiotọ yan iran. Ẹre ọ na ghi tie okpia ọkpa na tie ẹre Balam nọ gha die Moab nọ do tie ihẹn ne Ivbi Izrẹl.

Sokpan e Jehova keghi tama e Balam wẹẹ: ‘Ghẹ tie ihẹn ne Ivbi Izrẹl.’ Rhunmwuda ọni, e Balam ma ghi yo. Ọba e Balak keghi werriegbe tie Balam vbene ọ na tama rẹn wẹẹ irẹn gha viọ emwi ke emwi nọ gualọ nẹ. E Balam na wẹẹ irẹn i khian ye yo. Osanobua keghi tama e Balam wẹẹ: ‘U sẹtin gha khian, sokpan emwi ne I rhirhi tama ruẹ, ẹre u khian ta vbe u gha sẹ evba.’

E Balam keghi hin ekẹtẹkẹtẹ ọghẹe gha rrie Moab. Ọ na gha mwẹ ọnrẹn vbe orhiọn wẹẹ te irẹn khian tie ihẹn ne Ivbi Izrẹl agharhemiẹn wẹẹ e Jehova tama rẹn nẹ ghẹ ru vberriọ. Odibo ọghe Jehova keghi rhiegbe ma igba eha vbe odẹ. Sokpan e Balam ma bẹghe nene odibosa, ekẹtẹkẹtẹ ọghẹe ọkpa ẹre ọ ghaa bẹghe ẹre. Vbe ẹghẹ okaro ne odibo nii ya rhiegbe ma, ekẹtẹkẹtẹ ọghẹe na la uwu oha. Vbe iyeke ọni, ọ na vbe lẹẹ la eke ne okuta ye, ẹre ọ na mu owẹ e Balam gbe okuta. Vbe okiekie, ekẹtẹkẹtẹ nii na wa de lovbiẹ ye adesẹneva ukpo. Na kha na, e Balam na gha ya ukpokpo kinmwi ẹnrẹn.

Vbe iyeke ọni, e Jehova keghi ruẹ ne ekẹtẹkẹtẹ nii guan. Ẹre ekẹtẹkẹtẹ nii na gha nọ e Balam wẹẹ: ‘Vbọsiẹ ne u na fi mwẹ emwi vbenia?’ E Balam keghi kha wẹẹ: ‘Te u wa ya mwẹ ma. Akpawẹ te agbada mwẹ gue mwẹ mwa, I gha te gbuẹ rua.’ Ẹre ekẹtẹkẹtẹ nii na ghi kha wẹẹ: ‘Ẹi imẹ ẹre uwẹ hin ke otọ gha dee? I he ka ru ruẹ vbenia ẹdẹ ra?’

Vbe iyeke ọni, e Jehova keghi ruẹ ne Balam bẹghe odibo nii. Odibo nii na ghi nọ e Balam wẹẹ: ‘E Jehova ma tama ruẹ, ne u ghẹ tie ihẹn ne  Ivbi Izrẹl?’ E Balam keghi wanniẹn wẹẹ: ‘Orukhọ ẹre I wa ru na. I gha werriegbe gha rrie owa.’ Sokpan odibosa nii keghi tama rẹn wẹẹ: ‘U sẹtin ye gha rrie Moab, sokpan emwi ne Jehova wẹẹ ne u ta ọkpa ẹre u khian ta.’

Ọna rhie ẹwaẹn ne Balam ra? Hiehie! Vbe Balam ghi sẹ e Moab, ọ na ye gha hoo nọ tie ihẹn ne Ivbi Izrẹl, sokpan ẹghẹ ke ẹghẹ ne ọ ya gha hoo nọ tie ihẹn, ọ ghi gha na erhunmwu ne iran. Vbene ẹghẹ ghi ya gha khian, Ivbi Izrẹl keghi ya gu e Moab khọn, okuo nii ẹre Balam wu yi. U ma bẹghe ẹre wẹẹ, akpawẹ e Balam họn ẹmwẹ ne Jehova, ọni ẹre ọ gha te maan sẹ?