ÑYE’ELAN 28
Éjakas Balaam ja kobô
Bon b’Israël be boya mimbu bebé 40 nkôte si. Be maneya fe jiane meyoñ abui. Éyoñe ji, be nto minje’ese ya Moab. Jourdain a ne be vôme jôp da tôô. Be mbeme nyiine si ya ntiñetan. Balak, njô bôte ya Moab, a nga ko woñe na be zu fe jiane si jé. Ane a nga bañete Balaam e Moab, a jô nye na a ke yo’é bone b’Israël.
Ve Yéhôva a nga jô Balaam na: ‘Ô nji yiane ke yo’é bone b’Israel.’ Ane Balaam a nga bene ke. Balak a nga beta bañete nye éyoñe baa, a ka’ale nye na, a ye ve nye jôm ése a yi nge a ke yo’é ayoñ Israël. Ve Balaam a nga beta ben. Nde Zambe a nga jô nye na: ‘Ô ne ke, ve kobô’ô ve mam ma ye jô wo.’
Ane Balaam a nga bet éjakase jé, a lum asu mfa’a ya Moab. A nga bili ôvañe ya ke yo’é bon b’Israël, akusa bo Yéhôva a nga jô nye na, a bo teke de bo. Éngele Yéhôva a nga tebe nye ôsu biyoñe bilal. Balaam a nji yen éngele ate, ve éjakase jé é nga yene nye. Éyoñ ôsu, éjakas é nga taté sa’ale éngele a nyiine fé. Éyoñ baa, éjakas é nga ke jimbi mfine mekok, abo Balaam é ju’i. Éyoñe lale ki, nde éjakas é nga jiba bômbô njoñe yôp. Biyoñe bite bilal, Balaam a mbe a yiti’i éjakase jé a nkasa.
Mvuse ya valé, Yéhôva a nga bo na éjakas é kobô. É nga sili Balaam na: ‘Amu jé wo bôme ma abime di?’ Balaam ke na: ‘Wo yene ma ane akute dôé nga? Nge ma be me bili nkpwaté mekôn, ve me woéya wo.’ Nde éjakas é nga jô nye na: ‘Abim ane bia wo bi tabeya, ye me boya wo ana môs éziñ?’
Ane Yéhôva a nga kui Balaam mis, nye ve yen éngele. Nde éngele a nga jô nye na: ‘Nga Yéhôva a nga jô wo na, ô bo teke ke yo’é ayoñe dé?’ Ane Balaam a nga yalane na: ‘Ma te bo abé. Ma jiba bulane nda.’ Ve éngele a nga jô nye na: ‘Ô ne ke Moab, ve jame da, wo yiane ke kobô ve mejô Yéhôva a ye jô wo na ô kobô.’
Ye Balaam a nga nyoñe fo’o sikôlô ya jam é nga kui nye nga? Momo. A nga jeñe na a yo’é ayoñ Israël biyoñ bilal, ve biyoñe bite bise, Yéhôva a nga viane bo na a botane de. Mvuse ya valé, Israël a nga ke wosane Moab, nde Balaam a nga wu. Nga ô lôô na, nge Balaam a nga ye bo Yéhôva mewôk, a nji ye wu?
“Taba’an ntye, te boan ôzañ akum: amu akum abui môt a bili, e ne te ve nye ényiñ.”—Luc 12:15