Bann Izraelit ti’n reste dan dezer pour preski 40 an. Zot ti’n fini pran en kantite lavil for. La zot ti pe kanpe dan lakanpanny Moab, dan les Larivyer Zourden. Zot ti pare pour antre dan sa pei ki Zeova ti’n promet pour donn zot. Balak, lerwa Moab ti per pangar zot pran son pei. Alor, i ti envit en zonm ki apel Balaam, pour vin Moab e modi bann Izraelit.

Me Zeova ti dir Balaam: ‘Ou pa devret modi bann Izraelit.’ Alor Balaam pa ti ale. Lerwa Balak ti envit li ankor en fwa e i ti promet pour donn li tou sa ki i anvi. Me Balaam ti refize menm. Apre Bondye ti dir li: ‘Ou kapab ale, me ou devret dir zis sa ki mon pou dir ou dir.’

Balaam ti mont lo son bourik e i ti al dan sid ver Moab. I ti anvi al modi bann Izraelit menm si Zeova ti’n dir li pour pa fer li. Lanz Zeova ti aparet lo semen trwa fwa. Balaam pa ti kapab vwar sa lanz me son bourik ti vwar li. Premye kou, sa bourik ti kit semen e al dan en plantasyon. Apre, sa bourik ti sey apiy avek en miray ros e sa ti kwens lipye Balaam avek sa miray. Finalman, sa bourik ti zis dormi lo semen. Sak fwa, Balaam ti bat sa bourik avek en baton.

Apre sa trwazyenm fwa, Zeova ti fer sa bourik koze. Sa bourik ti demann Balaam: ‘Akoz ou pe bat mwan?’ Balaam ti reponn: ‘Ou’n fer mwan vin parey en bet. Si mon ti annan en lepe, mon ti pou touy ou.’ Bourik ti dir: ‘Depi tou sa letan ki mon’n anmenn ou, eski mon’n deza fer sa avek ou?’

Apre sa, Zeova ti fer Balaam vwar sa lanz. Sa lanz ti dir: ‘Zeova in dir ou pa modi Izrael.’ Balaam ti dir: ‘Mon’n mal azir. Mon pou retourn kot mwan.’ Me sa lanz ti dir: ‘Ou kapab al Moab, me ou devret dir zis sa ki Zeova i dir ou.’

 Eski Balaam ti’n aprann son leson? Non. Apre sa, Balaam ti sey modi Izrael. I ti sey trwa fwa, me sak fwa Zeova ti fer li beni zot olye modi zot. Finalman, bann Izraelit ti lager kont Moab e Balaam ti ganny touye. Pa i ti pou’n pli bon si Balaam ti’n ekout Zeova depi o konmansman!