A saan 40 ɲɔgɔn lo ye nin ye Israɛldenw be kongokolon kɔnɔ. U ye duguba caaman minɛ. Sisan, u siginin be Mowabu jamana na, Zurudɛn baji fan fɛ. Wagati sera u fɛ ka don layidu jamana kɔnɔ. Mowabu masacɛ Balaki siranna k’u bena ale ka jamana bɔsi. O kama, a ye cɛɛ dɔ weele min tɔgɔ ko Balamu, ka na Mowabu walisa ka Israɛldenw danga.

Nka Jehova y’a fɔ Balamu ye ko: ‘I man kan ka Israɛldenw danga.’ O kama, Balamu banna ka taga. Masacɛ Balaki y’a weele tugun ani k’a fɔ a ye ko a be fɛɛn o fɛɛn fɛ, ale bena o di a ma. Balamu bele banna ka taga. O kɔ, Ala ko: ‘I be se ka taga, nka ne bena min fɔ i ye, i ka ɲi k’o dɔrɔn lo fɔ.’

Balamu yɛlɛla a ka fali kan ka Mowabu sira minɛ. A tun b’a kɔnɔ ka Israɛldenw danga k’a sɔrɔ Jehova tun y’a fɔ a ye ko a kana o kɛ. Jehova ka mɛlɛkɛ nana lɔ sira kan. A y’o kɛ fɔɔ siɲɛ saba. Balamu tun tɛ se k’o mɛlɛkɛ ye, nka a ka fali tun be se k’a ye. A siɲɛ fɔlɔ, fali ye sira bila ka don foro kɔnɔ. A siɲɛ filanan, fali tagara nɔrɔ kogo la ka Balamu seen dɛrɛ. A laban, fali lara sira cɛmancɛ la. O siɲɛ saba bɛɛ la, Balamu ye fali bugɔ ni bere ye.

A siɲɛ sabanan kɔ, Jehova y’a kɛ fali kumana. Fali ye Balamu ɲininga ko: ‘Mun na i b’a la ka n’ bugɔ?’ Balamu ko: ‘I ye ne ta naloman ye! Ni murujan tun be ne bolo, n’ tun bena i faga.’ Fali ko: ‘I be yɛlɛ ne kan kabi saan caaman. Ne delila ka nin ɲɔgɔn kɛ i la wa?’

O kɔ, Jehova y’a to Balamu ye mɛlɛkɛ ye. Mɛlɛkɛ ko: ‘Jehova tun ko i kana Israɛldenw danga.’ Balamu ko: ‘ N’ ye kojugu kɛ. N’ bena kɔsegi.’ Nka mɛlɛkɛ ko: ‘I be se ka taga Mowabu, nka Jehova ye min fɔ i ye, i ka ɲi k’o dɔrɔn lo fɔ.’

 Yala Balamu ye hakili sɔrɔ o koow la wa? Ayi. O kɔ, Balamu y’a ɲini fɔɔ siɲɛ saba ka Israɛldenw danga. Nka o siɲɛ kelen kelen bɛɛ la, Jehova y’a kɛ a ye Israɛldenw duga. A laban, Israɛldenw ye Mowabu dugumɔgɔw kɛlɛ ani u ye Balamu faga. Ni Balamu tun ye mɛnni kɛ Jehova fɛ kabi a daminɛ na, o tun tɛna fisaya a ma wa?