Sa voleka ni 40 na yabaki nodra tiko na Isireli ena vanua talasiga. Era sa vakadruka e levu na koro. Ia qo sa kena gauna mera butuka na Vanua Yalataki nira sa keba toka ga ena buca o Moapi ena tokalau ni Uciwai na Joritani. E lomaleqa o Pelaki na tui Moapi nira na taura na Isireli na nona vanua. E mani sureta e dua na turaga, na yacana o Pelami me lako yani i Moapi me cudruvi ira na Isireli.

Ia e kaya vei Pelami o Jiova: ‘Mo kua ni cudruvi ira na Isireli.’ E mani bese ni lako o Pelami. E sureti koya tale o Tui Pelaki qai yalataka me solia vua na ka ga e vinakata. E bese tiko ga o Pelami. E qai kaya na Kalou: ‘O rawa ni lako, ia mo cavuta ga na vosa au tukuna vei iko.’

E vodo sara o Pelami ena nona asa me lako sobu i Moapi. E tukuna vua o Jiova me kua ni cudruvi ira na Isireli, ia e nakita lo me cakava qori. E rairai mai vakatolu e gaunisala na agilosi i Jiova. A sega ni raica rawa o Pelami, ia e raica na asa. Na imatai ni gauna e rairai kina, e vakatikitiki mai gaunisala na asa. Na ikarua ni gauna, e ravita na lalagavatu qai vakataotaka e lalaga na yava i Pelami. Kena iotioti e davo ena lomadonu ni gaunisala na asa. Ena gauna kece qori, e mokuta na asa o Pelami ena kau.

Ena ikatolu ni gauna, e vakavuna o Jiova me vosa na asa. E tarogi Pelami: ‘Na cava o mokuti au tiko kina?’ E sauma o Pelami: ‘O vakalialiai au. Ke tiko noqu iseleiwau, au na vakamatei iko.’ E kaya na asa: ‘Sa vakayabaki nomu vodoki au tiko. Au sa bau cakava vakadua qo vei iko?’

E qai vakavuna o Jiova me raica o Pelami na agilosi. E kaya na agilosi: ‘A vakaroti iko o Jiova mo kua ni cudruvi ira na Isireli.’ E  kaya o Pelami: ‘Au sa cala. Au na lesu i vale.’ Ia e kaya na agilosi: ‘O rawa ni lako i Moapi, ia mo cavuta ga na vosa e tukuna o Jiova.’

Vakacava e bau vuli o Pelami? Sega. E saga vakatolu me cudruvi ira na Isireli, ia e vakavuna o Jiova me vosa vakalougatataki ira ena gauna kece qori. Era qai valuti Moapi na Isireli, e vakamatei kina o Pelami. Ke a vakarorogo ga vei Jiova o Pelami ena imatai ni gauna, se vakacava?