Bhí na hIosraeilítigh beagnach 40 bliain sa bhfásach. Bhí cuid mhaith cathracha láidre curtha faoi chois acu. Bhí siad campáilte ar mhachairí Mhóáb taobh thoir d’abhainn na hIordáine. Bhí sé in am acu anois dul isteach sa Tír Tairngire. Bhí eagla ar Bhálác, rí Mhóáb, go raibh siad ag dul a thír a ghabháil. Mar sin thug sé cuireadh d’fhear darbh ainm Balám a theacht agus mallacht a chur ar na hIosraeilítigh.

Ach dúirt Iehova le Balám: ‘Ná cuir mallacht ar na hIosraeilítigh.’ Mar sin dhiúltaigh Balám a dhul go Móáb. Thug Rí Bálác cuireadh eile dó, agus gheall sé go dtabharfadh sé dó rud ar bith a bhí sé ag iarraidh. Mar sin féin, dhiúltaigh Balám. Dúirt Dia ansin: ‘Is féidir leat a dhul ann, ach ní féidir leat a rá ach na focail a chuirfidh mise i do bhéal.’

Chuaigh Balám ar a asal agus d’imigh leis ó dheas go Móáb. Bhí sé ar intinn aige mallacht a chur ar na hIosraeilítigh, cé go ndúirt Iehova leis gan é sin a dhéanamh. Tháinig aingeal Iehova roimhe ar an mbóthar trí huaire. Ní raibh Balám in ann an t-aingeal a fheiceáil, ach bhí an t-asal. Ar dtús d’imigh an t-asal den bhóthar isteach i bpáirc. Ansin chuaigh an t-asal isteach le taobh an bhalla, agus sáinníodh cos Bhalám idir an t-asal agus an balla. Sa deireadh, luigh an t-asal i lár an bhóthair. Tháinig fearg ar Bhalám agus bhuail sé an t-asal le slat.

Tar éis an tríú huair, bhain Iehova caint as an asal. D’fhiafraigh an t-asal de Bhalám: ‘Cén fáth a bhfuil tú do mo bhualadh?’ Dúirt Balám: ‘Tá ceap magaidh déanta agat díom. Mharóinn thú dá mbeadh claíomh agam.’ Dúirt an t-asal: ‘Nach bhfuil tú ag marcaíocht orm leis na blianta. Ar chaith mé mar seo leat riamh cheana?’

Ansin lig Iehova do Bhalám an t-aingeal a fheiceáil. Dúirt an t-aingeal: ‘Dúirt Iehova leat gan mallacht a chur ar Iosrael.’ Dúirt Balám: ‘Bhí mé as bealach. Rachaidh mé ar ais abhaile.’ Ach dúirt an t-aingeal leis: ‘Is  féidir leat a dhul go Móáb, ach ní féidir leat a rá ach na focail a chuirfidh Iehova i do bhéal.’

An raibh a cheacht foghlamtha ag Balám? Ní raibh. Ina dhiaidh sin, thriail sé trí huaire mallacht a chur ar Iosrael, ach is beannachtaí a chuir Iehova ina bhéal. Sa deireadh, d’ionsaigh na hIosraeilítigh Móáb agus maraíodh Balám. Nach mbeadh sé i bhfad níos fearr dá n-éistfeadh Balám le hIehova sa gcéad áit?