D Israelite sind scho fascht 40 Jahr i de Wüeschti und hend vil Städt erobered. Im Moment hend si ihri Zelt im Flachland vo Moab, das isch öschtlich vom Jordan. Jetzt isch d Ziit cho, wo si is versprochene Land chönnd gah. De Balak, de König vo Moab, het Angscht, dass ihm d Israelite sis Land wegnehmed. Drum seit er em Bileam, er söll doch bitte uf Moab cho und d Israelite verflueche, also ihne Schlechts wünsche.

Aber Jehova seit zum Bileam: «Du dörfsch d Israelite nid verflueche.» Drum gaht de Bileam nid uf Moab. De König Balak bittet ihn no einisch, zu ihm z cho, und er verspricht ihm, alles z gee, was er sich wünscht. Aber de Bileam seit wider Nei. Da seit Gott: «Also du chasch gah, aber du dörfsch nume das säge, wo ich dir säge.»

Drum macht sich de Bileam mit sim Esel uf de Weg uf Moab. Er het vor, d Israelite z verflueche, obwohl ihm Jehova das verbote het. En Engel versperrt em Bileam drü Mal de Weg. De Bileam gseht de Engel nid, aber sin Esel gseht ihn. Zum em Engel uszwiiche, lauft de Esel eifach ufs Feld use. Nachher drückt er sich gege e Steimuur und chlemmt em Bileam sin Fuess ii. Und am Schluss leit er sich eifach zmizt uf de Weg. Jedes mal haut de Bileam sin Esel miteme Stäcke.

Denn macht Jehova, dass de Esel afangt rede. Er fragt de Bileam: «Wiso schlasch du mich?» Da git de Bileam zur Antwort: «Wil du mich blöd herestellsch. Wenn ich es Schwert bi mir het, würd ich dich grad z tot schla.» De Esel seit: «Du bisch doch scho eso mängisch uf mir gritte. Ha ich dir i all dene Jahr je öppis Böses gmacht?»

Denn macht Jehova, dass de Bileam de Engel au gseht. De Engel seit: «Jehova het dir doch gseit, du söllsch d Israelite nid verflueche.» De Bileam seit: «Ich ha en Fehler gmacht. Ich gah wider hei.» Aber da seit de Engel: «Du chasch scho uf Moab gah, aber du dörfsch nume das säge, wo Jehova dir seit.»

Het echt de Bileam öppis drus glernt? Nei. Er versuecht gliich drü Mal, Israel z verflueche, aber jedes Mal luegt Jehova, dass d Israelite vom Bileam gsegnet werded. Schlussendlich griifed d Israelite Moab a und de Bileam wird umbracht. Was denksch, wärs nid besser gsi, wenn de Bileam vo Afang a uf Jehova glost hätti?