Eetaaina maʼaka 40 juya na israeliitakana chaa isashiipaʼa. Wainmairü tü pueulo nashutakalü aaʼu. Chashii joo naya suluʼu tü mmakat Moab, wüinpejeeruʼu sünain tü süchikat Jordán. Alüʼütshii naya süpüla ekerotoo suluʼumüin tü Mma Anasükat. Balac nünülia chi aluwataakai saaʼu Moab. Mmotshi maʼin nia suulia süsütünüin nuulia nuumain. Nüsaajirüinjeseʼe wanee wayuu Balaam münüshi süpüla nuʼulejüinjanain na israeliitakana.

Anuu nünüiki Jeʼwaa nümüin Balaam: «Nnojoishii puʼulejüinjanain na israeliitakana». Aʼalijiraashi Balaam suulia oʼunaa Moabmüin. Nimeʼejünaka aaʼin piantua nutuma chi aluwataaikai Balac süpüla nuʼunuinjachin. Nüküjain Balac nümüin naapeerüin nümüin tü kasa nuchuntakat. Niyoutuin Balaam tia. «Eeshi süpüla puʼunuin. Shia neʼe püküjainjatka tü tamüinjatkat pümüin», nümaka Maleiwa nümüin Balaam.

Nuʼunaka joo Balaam saaʼu nüpüliise, wattashi nia uuchimüin. Nikiiruʼusü Balaam nuʼulejüinjanain na israeliitakana mayaainjeʼe nüchiaain nia Jeʼwaa. Niiʼiyataaka apünüintua wanee aapiee suluʼu tü wopu nuʼunakalü aluʼu Balaam. Nnojoipejeʼe niʼrüin nia Balaam, shia eʼraka nia tü nüpüliisekat, ashunaasü shia saʼakamüin mojuui. Jee mapa, sülainraaka sünain ipairua süsepü piichi jee sootoliraaka mmoluʼu pasanain sünain tü wopukot. Niʼyaatashaatain Balaam tü püliikikat saaliijee tia.

Shiasaʼa mapa, kanüijaasü tü püliikikat nutuma Jeʼwaa. «¿Jamüsü piʼyaataka taya?», sümaka tü püliikikat nümüin Balaam. «¡Wayuu malashi taya paaʼinruʼu müinjachika taya putuma! Eereje wanee chajaruuta tamaʼana, toʼutayülüje aaʼin pia süka», nümaka Balaam. Susoutaka tü püliikikat nümüin: «Kakaliairü taya peʼejenain. ¿Jeʼratuaichi maajüin pia tatuma?».

Niʼraka Balaam chi aapieekai nutuma Jeʼwaa. «Nüchiaain pia Jeʼwaa suulia puʼulejüinjanain na israeliitakana», nümaka chi aapieekai nümüin. «Mojusia tü taaʼinrakat. Aleʼejeechia taya tachikuaʼa tepialuʼumüin», nümaka Balaam. Nusoutaka chi aapieekai nümüin: «Eeshi süpüla puʼunuin Moabmüin. Shiainjatpajaʼa püküjain tü nümakat Jeʼwaa pümüin».

 ¿Oonooshiche Balaam sümaa tü nümakat Jeʼwaa? Nnojo. Ayatüsia nüchajaain sukuwaʼipa süpüla nuʼulejüinjanain na israeliitakana. Apünüintua naaʼinrüin tia, nnojoipejeʼe nuuʼulaain Jeʼwaa naaʼinrüin shia; nüküjirüin Jeʼwaa kasa anasü namüin na israeliitakana. Ashutushii na israeliitakana mapa saaʼu Moab otta oʼutuna aaʼinchi Balaam. Anasüje nukuwaʼipa Balaam noonoole sümaa nünüiki Jeʼwaa, ¿aashimüin?