Umi israelita ningo haimete 40 áñorema oiko pe desiértore, ha ojagarráma hikuái heta tetã. Koʼág̃a haʼekuéra oĩ hína peteĩ lugár héravape Moab, upéva opyta éste gotyo rrío Jordángui. Upérõ ndahetavéima ofalta umi israelita oike hag̃ua pe yvy Jehová opromete vaʼekuépe chupekuéra. Pe rréi de Moab, hérava Balac, okyhyje umi israelita ojagarrárõ g̃uarã hetã yvy, upévare ojerure peteĩ kuimbaʼe héravape Balaam omaldesi hag̃ua umi israelítape.

Péro Jehová heʼi Balaámpe: “Ani remaldesi umi israelítape”. Upéicha rupi Balaam ndohoséi kuri Moábpe. Pe rréi Balac ohenoika jey chupe oho hag̃ua Moábpe ha opromete voi omeʼẽtaha chupe oimeraẽ mbaʼe ojeruréva, péro Balaam heʼi jey chupe ndohomoʼãiha. Upéi Ñandejára heʼi chupe: “Ameʼẽ ndéve permíso reho hag̃ua. Péro che haʼéva añoite ndéve eréta”.

Upémarõ Balaam ojupi hymba vúrro ári ha oho Moab gotyo. Haʼe oreko hína kuri iñakãme omaldesívo umi israelítape, Jehová heʼi porãramo jepe chupe ani hag̃ua ojapo upéva. Upévare Jehová ánhel osẽ chupe haperãme tres vése. Haʼe ndohechái kuri pe ánhelpe, péro hymba vúrro si ohecha. Pe primer osẽpe chupe, hymba vúrro osẽ pe tapégui ha omoinge chupe peteĩ ñúme. Upéi pe ánhel osẽ jey voi chupe, upépe katu pe hymba vúrro ojepete peteĩ múrore ha ojopy Balaámgui ipy pe múrore. Pe tres vesehápe katu la ivúrro oñempakáma chugui pe tape mbytetépe. Los tres vése Balaam ogarrotea hymba vúrrope ojapo haguére hese upéicha.

Upéi Jehová ojapo peteĩ milágro ha pe vúrro oñepyrũ oñeʼẽ ha oporandu Balaámpe: “¿Mbaʼe mbaʼéiko che ajapo nderehe ajeve péicha chegarrotea vaipa?”. Balaam heʼi chupe: “Nde ningo reñembohory cherehe ha chemorrenega. Arekórire peteĩ espáda, ajeʼíma rojuka vaʼerãmoʼã”. Upémarõ pe vúrro heʼi chupe: “¿Mboy tiémpoma piko reiko che ári, ha che piko ajapómava nderehe péicha?”.

Upémarõ Jehová ohesapeʼa Balaámpe ohecha hag̃ua pe ánhelpe, ha pe ánhel heʼi Balaámpe: “Jehová heʼi porã kuri ndéve ani hag̃ua reho remaldesi hag̃ua umi israelítape”. Upépe Balaam heʼi chupe: “Tuichaiterei ningo afalla. Aha jeýtante ógape”. Péro Jehová ánhel heʼi chupe: “Tereho katu Moábpe, péro Jehová heʼíva añoite ndéve eréta”.

 ¿Ndépa ere Balaam oaprendéma hague la Jehová omboʼeséva chupe? Nahániri, upe rire tres vése otantea omaldesi hag̃ua umi israelítape. Péro los tres vése Jehová ndohejái chupe ojapo upéva, síno ovendesika chupe umi israelítape. Upe rire umi israelita oataka Moab, ha Balaam omano avei umi moabita apytépe. ¡Ajépa iporãiteve vaʼerãmoʼã Balaam iñeʼẽrendúrire Jehovápe!