EHONGWA 28
Okasino kaBileam make hungire
Ovaisrael va kara ozombura ape 40 mokuti onguza. Owo va huura ovihuro ovinamasa ovingi. Nai ngunda ava tono ozondanda potutjandja twaMoab komuhuka wOnḓonḓu Jordan, ya ri oruveze ku wo okuhita mEhi Ekwizikwa. Balak, ngwa ri ombara yaMoab aa tira kutja Ovaisrael mave mu yeka ehi re. Okutja otja ningira omurumendu wena Bileam kutja me ye koMoab nu ma senge Ovaisrael.
Posiya Jehova wa raera Bileam a tja: ‘O sengi Ovaisrael.’ Okutja Bileam wa panḓa okuyenda. Ombara Balak ye mu ningira otjikando otjitjavari nai mu kwizikire kutja mai mu pe ngamwa otjiṋa tji ma vanga. Posiya Bileam wa panḓa. Okuzambo Mukuru wa tja: ‘Twende uriri, posiya mo sokukahungira oviṋa mbi me ku raere porwavyo.’
Bileam wa ronda kokasino ke nai koMoab tji tji ri kuṱa komamuho. Eye wa tya okusenga Ovaisrael nandarire kutja Jehova we mu tjaera okutjita nao. Omuengeli waJehova wa munika mondjira povikando vitatu. Bileam kaa yenene okumuna omuengeli posiya okasino ke okaake mu munu. Rutenga okasino kapita mondjira ake i mokuti. Okuzambo okasino kaya kuṱa komira nake kavetisa ombaze yaBileam momira. Korusenina okasino kakarara mokati kondjira. Otjikando atjihe Bileam aa tono okasino nokati.
Otjikando otjitjatatu, Jehova wa tjita kutja okasino ke hungire. Okasino kapura Bileam ake tja: ‘Ongwaye tji mo ndji tono?’ Bileam wa tja: ‘We ndji ṱisa ohoṋi. Andakuzu mbi nenga etje ku zepa.’ Okasino arire tji ka tja: ‘Ove we ndji kavira ozombura ozengi, nu mba rora okukutjita nai po?’
Okuzambo Jehova wa tjita kutja Bileam ma mune omuengeli. Omuengeli wa tja: ‘Jehova we ku rakiza kutja o sengi Israel.’ Bileam wa zira na tja: ‘Ami mba zunḓa. Opuwo me yaruka konganda.’ Posiya omuengeli wa tja: ‘Twende uriri koMoab, posiya kahungire imbi Jehova mbi me ku raere okuhungira porwavyo.’
Bileam u na pe rihongera kotjiṋa hi po? Kako. Kombunda yanao Bileam wa kondja okusenga Ovaisrael povikando vitatu, posiya otjikando atjihe Jehova wa tjita kutja me ve sere ondaya. Korusenina Ovaisael va havera Ovamoab nu Bileam wa zepwa. Katja tji rira otjiṋa otjiwa nao andakuzu Bileam wa puratena ku Jehova?
“Ṱakamiseye nu ritjevereye koukorokope ngamwa auhe, orundu ehupiro romundu kari zu menyangato rouini mbwe na wo.”—Lukas 12:15
