Orang Israel diau ba menua puang nyau ka 40 taun. Sida udah ngalahka mayuh kuta. Diatu, lebuh sida nirika kem ba emperan menua Moap tunga ke timur Sungai Jordan, nya meh maya sida tama ngagai Menua ti Udah Disemaya. Balak, raja menua Moap, takut menua iya dialahka orang Israel. Nya alai, iya mai seiku lelaki ke benama Balaam datai ngagai Moap lalu nyumpah orang Israel.

Tang Jehovah madah ngagai Balaam: ‘Nuan enda tau nyumpah orang Israel.’ Nyadi Balaam enda ngagai menua nya. Raja Balak mai iya sekali agi lalu besemaya deka meri semua utai dikedekaka iya. Tang, Balaam agi nulak. Udah nya, Petara madah: ‘Nuan ulih mupuk, tang nuan semina madahka utai ti diasuh Aku.’

Balaam nepan keledai iya lalu mupuk ngagai selatan menua Moap. Iya bisi pelan deka nyumpah orang Israel, taja pan Jehovah udah nangkan iya anang ngereja nya. Melikat Jehovah ayan ba tengah jalai tiga kali. Balaam enda ulih meda melikat nya tang keledai iya ulih. Keterubah iya, keledai nya nguing ngagai padang. Udah nya, iya nyandih ba dinding batu lalu ngempitka kaki Balaam. Pengujung iya, keledai nya gali ba tengah jalai. Tiap kali tu nyadi, Balaam malu keledai iya ngena kayu.

Pengudah kali ketiga, Jehovah ngasuh keledai nya bejaku. Ku keledai nya nanya Balaam: ‘Nama kebuah nuan malu aku?’ Ku Balaam: ‘Laban nuan udah ngemelika aku! Enti sema aku bisi pedang, aku deka munuh nuan.’ Keledai nya bejaku: ‘Udah betaun nuan nepan aku. Kati aku kala ngaga nuan baka tu suba?’

Udah nya Jehovah ngasuh Balaam meda melikat nya. Ku melikat nya: ‘Jehovah nangkan nuan enda tau nyumpah Israel.’ Ku Balaam: ‘Aku salah. Aku deka pulai ke rumah.’ Tang ku melikat nya: ‘Nuan ulih mupuk ngagai Moap, tang semina madahka utai ke dipadah Jehovah ngagai nuan.’

 Kati Balaam belajar ari utai ti nyadi? Enda. Udah nya, Balaam nguji deka nyumpah orang Israel tiga kali, tang tiap kali iya ngereja nya, Jehovah ngasuh iya merekat sida. Ke penudi iya, orang Israel nyerang Moap lalu Balaam dibunuh. Enda ke manah agi enti Balaam ningaka Jehovah ari pun?