Dandani 40 a tawenen nga adda dagiti Israelita iti let-ang. Nasakupdan ti adu a napigsa a siudad. Addada itan iti tanap ti Moab iti daya ti Karayan Jordan, ket agsagsaganadan a sumrek iti Naikari a Daga. Mabuteng ni Balak nga ari ti Moab a maagaw dagiti Israelita ti dagana. Isu a pinaayabanna ti maysa a lalaki nga agnagan Balaam tapno ilunodna dagiti Israelita.

Ngem imbaga ni Jehova ken Balaam: ‘Dimo ilunod dagiti Israelita.’ Isu a saan a napan ni Balaam. Pinaayaban manen ni Ari Balak ni Balaam ket inkarina nga itedna ti amin a dawatenna. Ngem saan latta a napan ni Balaam. Idi kuan, imbaga ti Dios kenkuana: ‘Mabalinmo ti mapan, ngem ti laeng ibagak ti mabalinmo nga ibaga.’

Nagsakay ni Balaam iti asnona ket nagpaabagatan nga agturong iti Moab. Kayatna nga ilunod dagiti Israelita uray imbaga ni Jehova a dina aramiden dayta. Idi agbibiahe, namitlo a nagparang ti anghel ni Jehova. Saan a makita ni Balaam ti anghel, ngem makita ti asnona. Iti damo a panagparang ti anghel, naglisi ti asno ket napan iti talon. Iti maikadua, impideg ti asno ti bagina iti pader ket nalipit ti saka ni Balaam. Ket iti maikatlo, nagidda ti asno iti tengnga ti dalan. Kadagita a tallo a gundaway, binaut ni Balaam ti asno.

Iti naudi a panangbautna, pinagsao ni Jehova ti asno. Imbaga ti asno ken Balaam: ‘Apay a babautennak?’ Kinuna ni Balaam: ‘Pagbalbalinennak nga awan ammona. Pinatayka koman no adda espadak.’ Imbaga ti asno: ‘Adun a tawen a pagsaksakayannak. Inaramidko kadi idin ti kastoy?’

Idi kuan, impalubos ni Jehova a makita ni Balaam ti anghel. Kinuna ti anghel: ‘Imbaga ni Jehova a dimo ilunod ti Israel.’ Kinuna ni Balaam: ‘Nagbasolak. Agawidakon.’ Ngem imbaga ti anghel: ‘Mabalinmo ti mapan iti Moab, ngem ti laeng ibaga ni Jehova ti mabalinmo nga ibaga.’

 Nakasursuro ngata ni Balaam? Saan. Kalpasan dayta, namitlo a pinadasna nga ilunod dagiti Israelita, ngem kada ilunodna ida, tignayen ni Jehova a mangbendision kadakuada. Idi agangay, ginubat dagiti Israelita ti Moab, ket napapatay ni Balaam. Saan kadi a nasaysayaat no idi damo pay laeng ket nagtulnogen ni Balaam ken Jehova?