Israela ni nam mali kaw du ai shaning 40 daram rai wa sai. Shanhte gaw mare kaba law law hpe gasat awng dang lu wa ai. Shanhte gaw Yawdan hka a sinpraw maga na Moba pa layang hta dap jung nga ma ai. Ya, shanhte gaw Ga Sadi Tawn Da Ai Mungdan de shang na aten rai sai. Moba hkawhkam Balak gaw shi a mungdan sum mat na hpe hkrit tsang nga ai. Dai majaw, Balak gaw Israela ni hpe dagam na matu Balam hpe Moba mung de shaga dat ai.

Raitim, Balam hpe Yehowa tsun ai gaw: ‘Israela ni hpe nang dagam lu na n rai.’ Dai majaw, Balam gaw sa na matu ningdang kau ai. Hkawhkam Balak gaw Balam hpe kalang bai saw shaga nna, nang ra ai hpa raitim jaw na nga nna ga sadi jaw ai. Raitim, Balam kahtap nna ningdang kau ai. Yehowa ndai hku tsun ai: ‘Shanhte hpang sa su, raitim ngai tsun ai hku sha nang tsun lu na re.’

Balam gaw shi a lawze jawn nna Moba mung nga ai dingda maga de sa wa ai. Yehowa dai hku n tsun na matu tsun tim, shi gaw Israela ni hpe dagam na matu hkyen lajang wa ai. Yehowa a lamu kasa gaw lam kaw masum lang dan pru dan ai. Balam gaw lamu kasa hpe n mu tim, shi a lawze chyawm gaw mu ai. Shawng nnan na lang gaw lam nmaw kaw nna, makau kaw nga ai yi de shang mat ai. Lahkawng ngu na lang gaw nlung shakum maga sit anawt mat ai majaw Balam a lagaw anep mat ai. Masum lang hta, lawze gaw lam ka-ang hta hpum mat ai. Lawze dai hku galaw shagu, Balam gaw shi hpe shingna hte kayat ai.

Masum lang byin ngut ai hpang, lawze ga lu shaga hkra Yehowa galaw dat ai. Lawze gaw Balam hpe: ‘Ngai hpe hpa majaw kayat a ta?’ nga nna san ai. Balam gaw : ‘Nang ngai hpe mana shatai taw ai i? Lama na ngai kaw nhtu nga yang, nang hpe sat kau sai’ nga nna tsun ai. Lawze gaw: ‘Nang ngai hpe shaning law law jawn wa sai. Shawoi dai zawn nang hpe ngai galaw ga ai i?’ nga nna tsun ai.

Dai shaloi, Yehowa gaw lamu kasa hpe Balam mu lu hkra galaw ya dat ai. Lamu kasa tsun ai gaw: ‘Yehowa gaw Israela ni hpe n dagam na matu nang hpe sadi jaw wa sai.’ Balam gaw: ‘Ngai shut mat sai. Ngai bai n htan wa sana’ nga nna tsun ai. Lamu kasa chyawm gaw: ‘Nang Moba mung de mai sa ai, raitim, Yehowa tsun ai hpe sha nang tsun ra na re’ nga nna tsun ai.

 Balam gaw shi a mabyin kaw nna sharin la wa ai kun? N sharin la wa ai. Balam gaw Israela ni hpe dagam na matu masum lang shakut wa ai. Raitim, Yehowa gaw lang shagu dagam ai ga a malai, shaman ai ga sha pru wa hkra galaw ya dat ai. Dai hpang, Israela ni Moba mung hpe gasat nna Balam mung sat kau hkrum ai. Balam gaw shawng nnan kaw nna Yehowa a ga madat wa yang kaja ai n re i?