Israelitas dja staba ku kuazi 40 anu na dizértu. Dja es tomaba txeu sidadi. Gósi es arma kanpamentu na téra di Moabi, di otu ladu di Riu Jurdon. Txiga ténpu di es entra na kel téra ki Deus prometeba es. Balaki, rei di Moabi, staba ku medu pa israelitas ka tomaba ses téra. Nton el manda buska un ómi ki txomaba Balaon pa bai faze maldison pa israelitas.

Má Jeová fla Balaon: ‘Ka bu faze maldison pa israelitas.’ Nton Balaon ka bai. Rei Balaki konvida-l otu bês i el promete ma el ta da-l tudu kuza ki el kreba. Má simé Balaon ka bai. Nton Deus fla: ‘Bu pode bai, má bu ta fla sô kel ki N manda-u’.

Balaon monta na se buru i el bai pa Moabi. Nbóra Jeová fla-l pa el ka faze maldison pa israelitas, el pensa na faze simé. Anju di Jeová parse na se kaminhu três bês. Balaon ka odja anju, má buru di Balaon odja. Primeru bês buru sai fóra kaminhu. Dipôs buru bai pa un paredi di pédra i pé di Balaon da na paredi. Na tirseru bês, buru para i el deta na meiu di kaminhu. Na tudu kes bês Balaon da buru ku pó.

Dipôs di kes três bês, Jeová poi buru ta pâpia. Buru pergunta Balaon: ‘Pamodi ki bu sta da-m ku pó?’ Balaon fla: ‘Bu sta faze-m di dodu. Si N tinha un spada N ta mataba bo gósi li.’ Buru fla: ‘Dja N ten un monti anu ta karega-u. N kustuma faze-u kel-li algun bês?’

Nton Jeová faze Balaon odja kel anju. Anju fla-l: ‘Jeová aviza-u pa bu ka faze maldison pa Israel.’ Balaon fla: ‘N faze mariadu. Dexa-m volta pa kaza.’ Má anju fla-l: ‘Bu pode bai pa Moabi, má bu ta fla sô kel ki Jeová manda-u fla.’

Balaon prende lison? Nau. Dipôs di kel-li, Balaon tenta faze maldison pa Israel três bês, má na tudu kes bês Jeová poi kes  maldison ta bira benson pa israelitas. Na fin, israelitas ataka Moabi i Balaon matadu. É ka éra mutu midjór si Balaon obiba ku Jeová lógu na primeru bês?