Bantu ya Izraele vandaka me sala dezia kiteso ya bamvula 40 na ntoto ya zelo na zelo. Bo nungaka dezia bambanza mingi ya ngolo. Ntangu yai, sambu bo salaka camp na banseke ya Moabi na esti ya Nzadi ya Yordani, yo vandaka ntangu ya kukota na Ntoto ya Lusilu. Balaki, ntotila ya Moabi, vandaka kuwa boma nde bo ta botula ntoto na yandi. Yo yina, yandi bingaka muntu mosi, zina na yandi Balami, sambu yandi kwisa na Moabi mpi kusinga bantu ya Izraele.

Kansi Yehowa songaka Balami nde: ‘Nge fwete singa ve bantu ya Izraele.’ Yo yina, Balami buyaka kukwenda. Ntotila Balaki bingaka yandi mbala ya zole mpi silaka na kupesa yandi konso kima yina yandi me zola. Kansi, Balami buyaka. Ebuna Nzambi tubaka nde: ‘Nge lenda kwenda, kansi nge ta tuba kaka mambu yina mono ta songa nge na kutuba.’

Balami bakaka mpunda na yandi mpi kwendaka na Moabi na ndambu ya sudi. Yandi vandaka ti lukanu ya kusinga bantu ya Izraele, ata Yehowa songaka yandi ve na kusala yo. Wanzio ya Yehowa monanaka na nzila mbala tatu. Balami vandaka kumona ve wanzio, kansi mpunda na yandi vandaka kumona wanzio. Ntete, mpunda katukaka na nzila mpi kotaka na nseke. Na nima, mpunda kwendaka kututana na kibaka ya matadi, mpi dikulu ya Balami tutanaka na kibaka yina. Nsuka-nsuka, mpunda lalaka na kati-kati ya nzila. Na konso mbala, Balami vandaka kubula mpunda nti.

Na nima ya mbala ya tatu, Yehowa salaka nde mpunda kutuba. Mpunda yulaka Balami nde: ‘Sambu na nki nge ke landa kubula mono?’ Balami tubaka nde: ‘Nge me kumisa mono zoba. Mono zolaka kufwa nge kana mono vandaka ti mbela ya bitumba.’ Mpunda tubaka nde: ‘Nge me tambulaka na zulu na mono bamvula mingi. Keti mono me sadilaka nge dezia mambu mutindu yai?’

Ebuna Yehowa salaka nde Balami kumona wanzio. Wanzio tubaka nde: ‘Yehowa kebisaka nge na kusinga ve Izraele.’ Balami tubaka  nde: ‘Mono me sala mbi. Mono ta vutuka na bwala na mono.’ Kansi wanzio tubaka nde: ‘Nge lenda kwenda na Moabi, kansi nge ta tuba kaka mambu yina Yehowa ke songa nge na kutuba.’

Keti Balami bakaka dilongi? Ve. Na nima, Balami mekaka kusinga Izraele mbala tatu, kansi konso ntangu Yehowa pusaka yandi na kusakumuna bo. Nsuka-nsuka, bantu ya Izraele nwanisaka Moabi, mpi bo fwaka Balami. Keti yo zolaka kuvanda ve mbote kana Balami wilaka Yehowa na mbala ya ntete?