GĨCUNJĨ KĨA 28
Ndigiri ya Balaamu Kwaria
Aisiraeli maaikarĩte werũ-inĩ hakuhĩ mĩaka 40. Nĩ maahootete matũũra maingĩ maarĩ na hinya mbaara-inĩ. Rĩu ihinda rĩao rĩarĩ ikinyu rĩa kũingĩra Bũrũri wa Kĩĩranĩro, na maambĩte hema ciao werũ-inĩ wa Moabi mwena wa Irathĩro wa Rũũĩ rwa Jorodani. Balaki, mũthamaki wa Moabi, nĩ eetigagĩra ndakahootwo nĩ Aisiraeli. Nĩ ũndũ ũcio, nĩ aatũmanĩire mũndũ wetagwo Balaamu athiĩ Moabi nĩguo akarume Aisiraeli.
No Jehova eerire Balaamu ũũ: ‘Ndũkarume Aisiraeli.’ Nĩ ũndũ ũcio Balaamu akĩrega gũthiĩ. Mũthamaki Balaki nĩ aamũtũmanĩire rĩa kerĩ na akĩmwĩra nĩ ekũmũhe kĩrĩa gĩothe angĩendire. Ĩndĩ o na rita rĩu Balaamu nĩ aaregire. Ngai aacokire akĩmwĩra ũũ: ‘No ũthiĩ, ĩndĩ ũrĩa ngũkwĩra nĩguo ũkoiga.’
Balaamu aaikarĩire ndigiri yake na akĩambĩrĩria thabarĩ ya gũthiĩ Moabi. Aarĩ na mũbango wa kũruma Aisiraeli o na gũtuĩka Jehova nĩ aamwĩrĩte ndageeke ũguo. Mũraika wa Jehova nĩ aamumĩrĩire maita matatũ arĩ njĩra-inĩ, ĩndĩ Balaamu ndaamuonaga, no ndigiri yake nĩ yamuonaga. Ndigiri ĩyo yambire ĩkĩehera njĩra-inĩ ĩgĩthiĩ mũgũnda. Ĩgĩcoka ĩkĩĩhatĩrĩria rũthingo-inĩ na ĩkĩhinyĩrĩria kũgũrũ kwa Balaamu ho. Marigĩrĩrio-inĩ yakomire gatagatĩ wa njĩra. Maita macio mothe ndigiri ĩyo yekaga ũguo, Balaamu nĩ aamĩgũthaga na rũthanju.
Balaamu agũtha ndigiri ĩyo rita rĩa gatatũ, Jehova nĩ aatũmire yarie. Yoririe Balaamu ũũ: ‘Kaĩ ngwĩkĩte atĩa nĩguo ũikare ũkĩngũthaga?’ Nake akĩmĩcokeria: ‘Ũratũma haane kĩrimũ nĩkĩ? Ingiuma na rũhiũ nĩ ingĩkũũragĩte.’ Nayo ndigiri ĩkĩmwĩra: ‘Ndũire ngũkuuĩte ihinda iraihu. Nĩ ndĩ ndagwĩka ũndũ ta ũyũ rĩngĩ?’
Jehova aacokire agĩtũma Balaamu one mũraika. Mũraika ũcio amwĩrire ũũ: ‘Githĩ Jehova ndaragũkanirie ndũkarume Aisiraeli?’ Balaamu nake akiuga: ‘Nĩ njĩhĩtie. Na nĩ ngũcoka mũciĩ.’ No mũraika amwĩrire ũũ: ‘No ũthiĩ Moabi, ĩndĩ ũkaaria o ũhoro ũrĩa Jehova agakwĩra.’
Hihi Balaamu nĩ eerutire na ũndũ ũcio? Aca tondũ aacokire akĩgeria kũruma Aisiraeli maita matatũ, no Jehova aatũmire amarathime maita macio mothe matatũ. Marigĩrĩrio-inĩ Aisiraeli nĩ maatharĩkĩire itũũra rĩa Moabi na makĩũraga Balaamu. Na githĩ ti kaba Balaamu angĩathikĩrĩirie Jehova kuuma o kĩambĩrĩria?
“Mwĩmenyerere ũkoroku wa mĩthemba yothe, tondũ o na rĩrĩa mũndũ arĩ na ũingĩ, muoyo wake ndumanaga na indo iria arĩ nacio.”—Luka 12:15
