Ovaisrael ova kala mombuwa hanga oule womido 40. Ova li va finda oilando ihapu inaenghono. Opo nee ova li va onga onhanda momalufilu aMoab koushilo womulonga waJordan nosha li efimbo lokuya mEdu lEudaneko. Balak, ohamba yaMoab, okwa li a tila kutya ota ka kufwa edu laye. Nomolwaasho okwa li a ifana omulumenhu wedina Bileam e uye kuMoab opo a finge Ovaisrael.

Ashike Jehova okwa li a lombwela Bileam ta ti: ‘Ino finga Ovaisrael.’ Onghee hano, Bileam okwa li a anya okuya kuBalak. Ohamba Balak oya li ye mu ifana olutivali ndele tai mu udanekele kutya otai ke mu pa keshe osho a hala. Pomhito oyo Bileam okwa li a anya natango. Opo nee Kalunga okwa ti: ‘Oto dulu okuya, ndele ka popye ashike osho handi ku lombwele.’

Bileam okwa londa kondongi yaye ndele tai a yuka koushilo waMoab. Okwa li a tokola a ka finge Ovaisrael, nonande Jehova okwa li e mu lombwela ehe shi ninge. Opo nee omweengeli waJehova okwa li e mu holokela mondjila lwoikando itatu. Bileam ka li e wete omweengeli, ashike ondongi yaye oya li i mu wete. Tete, ondongi oya li ya dja mo mondjila, nokonima oya li ya yaamena kekuma nokufelekenya omhadi yaBileam. Hauxuninwa, ondongi oya li ya nangala mokati kondjila. Ndele Bileam okwa kala ashike ta denge ondongi noshiti efimbo alishe.

Konima yoshikando oshititatu, Jehova okwa li a ningifa ondongi i popye. Ondongi oya li ya pula Bileam tai ti: ‘Oto dengele nge shike?’ Bileam okwa nyamukula ta ti: ‘Owa nyikifa nge oulai, ngeno okwa li ndi na eongamukonda ngeno onde ku dipaa ashike.’ Ondongi oya tya kuBileam: ‘Owa kala ho londo nge oule womido dihapu. Mbela onda kala handi ku ningi nai?’

Opo nee Jehova okwa li a ningifa Bileam a mone omweengeli. Omweengeli okwa tya kuye: ‘Jehova okwe ku londwela uha finge Ovaisrael.’ Opo nee Bileam okwa tya: ‘Onda ninga epuko, ohandi shuna keumbo.’ Omweengeli okwa tya kuye: ‘Oto dulu okuya kuMoab, ndele ka popye ashike eshi Jehova te ku lombwele.’

 Mbela Bileam okwa li ngoo e lihonga oshilihongomwa? Ahowe. Konima yaasho, Bileam okwa li a kendabala okufinga Ovaisrael lwoikando itatu, ndele pomhito keshe Jehova okwe mu ningifa e va nangeke noupuna. Hauxuuninwa, Ovaisrael ova li va ponokela Moab, na Bileam okwa li a dipawa. Mbela kasha li pandunge kuBileam okupwilikina kuJehova pomhito yotete?