Bena Isalela baikele mu kiselebwa myaka 40. Bashinjile mizhi yakosa yavula bingi. Bafikile ku bushiya bwa mukola wa Yodano mu kiselebwa kya Moabu. Pano kimye kyafikile kuba’mba batwele mu Ntanda ya Mulaye. Belaka, mfumu wa bena Moabu waumvwine bingi moyo. Walangulukilenga’mba basakumwangata kyalo kyanji. Kino kyamulengejile kwita Balamu kwiya ku Moabu kuba’mba afinge bena Isalela.

Yehoba waambijile Balamu amba: ‘Kange ufiinge bena Isalela ne.’ Onkao mambo, Balamu wakaine kuya ku Moabu. Bino Mfumu Belaka waichile Balamu jibiji ne kumubula’mba ukamupa bintu byonse byo akakeba. Bino Balamu wakaine. Kepo Lesa amwambijile’mba: ‘Yanga, pano ukayetu na kwamba byonka byo nkakubuula.’

Balamu wakanjijile pa mbongolo wanji ne kuya ku kabeta ka bulenge bwa Moabu. Wakebelenga kufiinga bena Isalela nangwa kya kuba Yehoba wamwambijile kubula kwibafiinga. Malaika wa Yehoba waishile mu jishinda kulutwe bimye bisatu. Bino Balamu kechi wamwene uno malaika ne. Mbongolo ye wamumwenengatu. Kimye kitanshi mbongolo wafumine mu jishinda ne kuya mungye. Kimye kya bubiji, mbongolo washakamijile ku nsakwa ya mabwe ne kushenkakenyako kulu kwa kwa Balamu. Kyapeleleko, mbongolo wafukamine panshi mu jishinda. Pa bino bimye byonse bisatu, Balamu wapuminenga mbongolo na kamama.

Byo amupumine ja busatu, Yehoba walengejile mbongolo kwamba. Mbongolo waambijile Balamu amba: ‘Mambo ka o mubena kumpumina?’ Balamu waambile’mba: ‘Wandengesha bumvu. Inge najinga na mpoko inge na kwipaya.’ Mbongolo waambile’mba: ‘Nemwingijila pa myaka yavula. Nanchi nakyubapo kala bino nyi?’

 Kepo Yehoba alengejile Balamu kumona malaika. Uno malaika wamwambijile’mba: ‘Yehoba wakubujile’mba kange ukafiinge bena Isalela ne.’ Balamu waambile’mba: ‘Natamisha. Nsakubwela ku nzubo.’ Bino malaika waambile’mba: ‘Yanga ku Moabu, ukambe byonka bikakubuula Yehoba.’

Nanchi Balamu wafunjijileko ku bino nyi? Ine. Balamu wafiingile bena Isalela pa bimye bisatu. Bino Yehoba wibapesheshenga bena Isalela inge Balamu wibafiinga. Kepo bena Isalela balukukile bena Moabu, kabiji Balamu naye bamwipaile. Inge kya kuba Balamu wakookejile Yehoba, bino bintu inge kechi byamumwekejile ne.