Di Izrɛlayt dɛn bin dɔn de na di wildanɛs fɔ lɛk 40 ia so. Dɛn bin dɔn win bɔku big siti dɛn pan fɛt. Naw as dɛn de na Moab nia di ist pat na riva Jɔdan, di tɛm bin dɔn rich fɔ mek dɛn go insay di Prɔmis Land. Belak we na di kiŋ na Moab bin de fred se dɛn go tek in land na in an. So i bin kɔl wan man we nem Belam fɔ kam na Moab ɛn swɛ di Izrɛlayt dɛn.

Bɔt Jiova tɛl Belam se: ‘Nɔ swɛ di Izrɛlayt dɛn.’ So Belam nɔ bin gri fɔ go. Kiŋ Belak bin kɔl am fɔ di sɛkɔn tɛm ɛn prɔmis fɔ gi am ɛnitin we i want. Bɔt stil, Belam nɔ gri. Dɔn Gɔd tɛl am se: ‘Yu kin go, bɔt na wetin a tɛl yu nɔmɔ yu fɔ tɔk.’

Belam tek in dɔnki ɛn go na di sawt pat na Moab. I bin plan fɔ swɛ di Izrɛlayt dɛn, pan ɔl we Jiova bin dɔn tɔk se i nɔ fɔ du so. Jiova in enjɛl bin apia tri tɛm na rod. Belam nɔ bin de si di enjɛl, bɔt in dɔnki bin de si am. Fɔs di dɔnki kɔmɔt na di rod ɛn go na di fil. Dɔn di dɔnki go nia wan ston wɔl ɛn jam Belam in fut de. Faynali, di dɔnki ledɔm midul di rod. Ɔl dɛn tɛm dɛn de, Belam bin de bit di dɔnki wit stik.

Afta di tɔd tɛm, Jiova bin mek di dɔnki tɔk. Di dɔnki aks Belam se: ‘Wetin a du yu we mek yu de bit mi so?’ Belam tɔk se: ‘Yu mek a luk lɛk fulman. A fɔ dɔn kil yu if a bin gɛt sɔd.’ Di dɔnki tɔk se: ‘Yu dɔn rayd mi fɔ lɔng tɛm. A dɔn ɛva du dis to yu?’

Dɔn Jiova bin mek Belam si di enjɛl. Di enjɛl tɔk se: ‘Jiova bin dɔn wɔn yu mek yu nɔ swɛ Izrɛl.’ Belam tɔk se: ‘A dɔn du bad. A de go bak na os.’ Bɔt di enjɛl tɔk bak se: ‘Yu kin go na Moab bɔt na wetin Jiova tɛl yu nɔmɔ na in yu fɔ se.’

Belam bin lan in lɛsin? Nɔ. Afta ɔl dis we apin, Belam bin tray fɔ swɛ di Izrɛlayt dɛn tri tɛm, bɔt ɛnitɛm we Belam tray fɔ  swɛ di Izrɛlayt dɛn, Jiova bin de mek i blɛs dɛn. As tɛm de go, di Izrɛlayt dɛn bin atak Moab ɛn dɛn bin kil Belam. Yu nɔ tink se i bin fɔ bɛtɛ fɔ mek Belam lisin to Jiova we i bin tɔk to am?