တၢ်မၤလိ ၂၈
စီၤဘံးလၣ်အကသ့ၣ်ယီၤတဲတၢ်
ပှၤအံၣ်စရ့လးဖိတဖၣ် အိၣ်ဝဲလၢပှၢ်မုၢ်ကနၢအနံၣ် ၄၀ ဃၣ်ဃၣ်လံ. ဒီးအဝဲသ့ၣ်ဒုးနၢၤဝဲ ဝ့ၢ်လၢ အဂံၢ်ဆူၣ်ဘါဆူၣ်တဖၣ်အါဖျၢၣ်လီၤ. ခဲအံၤ အဝဲသ့ၣ်အိၣ်လၢကီၢ်မိၤအးလၢ ထံကျိယၢ်ဒ့ၣ်အဝၢ်ဘးခီလၢ မုၢ်ထီၣ်တကပၤန့ၣ်လီၤ. ဒီးဆၢကတီၢ်ဘၣ်လၢ ပှၤအံၣ်စရ့လးဖိတဖၣ် ကလဲၤနုာ်လီၤလၢ ကီၢ်တၢ်စံးပာ်အပူၤလီၤ. စီၤဘၤလးလၢအမ့ၢ်ပှၤမိၤအးဖိအစီၤပၤန့ၣ် ပျံၤဝဲလၢပှၤအံၣ်စရ့လးဖိတဖၣ် ကဟဲဒုးနၢၤ အထံကီၢ်လီၤ. လၢတၢ်န့ၣ်အဃိ အဝဲကွဲမုာ်ဝဲစီၤဘံးလၣ်ဒ်သိးကဟဲလၢ ကီၢ်မိၤအးဒီး ကဆိၣ်အၢဝဲပှၤအံၣ်စရ့လးဖိတဖၣ်လီၤ.
ဘၣ်ဆၣ် ယဟိဝၤယွၤတဲဘၣ် စီၤဘံးလၣ်လၢ– ‘နတဘၣ်လဲၤဆိၣ်အၢ ပှၤအံၣ်စရ့လးဖိတဖၣ်ဘၣ်.’ အဃိ စီၤဘံးလၣ်တလဲၤဝဲဘၣ်. စီၤပၤဘၤလးကွဲမုာ်ကဒီး စီၤဘံးလၣ်လၢခံတဘျီ ဒီးအၢၣ်လီၤဝဲလၢ ကယဲၢ်တၢ်လၢစီၤဘံးလၣ်ဃ့ဝဲန့ၣ် ကဟ့ၣ်လီၤဝဲလီၤ. ဘၣ်ဆၣ် စီၤဘံးလၣ်တလဲၤဝဲဘၣ်. လၢခံကတၢၢ် ကစၢ်ယွၤတဲဘၣ်စီၤဘံးလၣ်လၢ– ‘နလဲၤလၢကီၢ်မိၤအးအပူၤသ့ ဘၣ်ဆၣ် နကဘၣ်တဲတၢ်ထဲ တၢ်လၢ ယမၢနတဲန့ၣ်လီၤ.’
စီၤဘံးလၣ်ဒိးထီၣ်ကသ့ၣ်ယီၤဒီးလဲၤဝဲလၢ ကလံၤထံးတခီဆူကီၢ်မိၤအးလီၤ. ယဟိဝၤယွၤတဲအီၤလၢ တဘၣ်လဲၤဆိၣ်အၢပှၤအံၣ်စရ့လးဖိတဖၣ်ဘၣ်. ဘၣ်ဆၣ် စီၤဘံးလၣ်ပာ်လီၤအသးလၢ ကလဲၤဆိၣ်အၢဝဲပှၤအံၣ်စရ့လးဖိတဖၣ်လီၤ. အဃိ ယဟိဝၤယွၤအမူခိၣ်ကလူး တြီဃာ်ဝဲစီၤဘံးလၣ်လၢကျဲမုၢ်ပူၤသၢဘျီန့ၣ်လီၤ. စီၤဘံးလၣ်တထံၣ်ဝဲ မူခိၣ်ကလူးဘၣ်. ဘၣ်ဆၣ် အကသ့ၣ်ယီၤထံၣ်ဝဲ မူခိၣ်ကလူးလီၤ. ဖဲကသ့ၣ်ယီၤထံၣ်ဝဲမူခိၣ်ကလူးအခါ အဆိကတၢၢ်န့ၣ် ကသ့ၣ်ယီၤဟးထီၣ်ကွံာ်လၢ ကျဲမုၢ်ဖီခိၣ် ဒီးလဲၤဝဲဆူတၢ်ပျီပူၤလီၤ. ခံဘျီတဘျီန့ၣ် ကသ့ၣ်ယီၤသနံးအသးဒီး တၢ်ဒူၣ်ကပၤအဃိ စီၤဘံးလၣ်အခီၣ်ဘၣ်တံၢ်ဒီး တၢ်ဒူၣ်လီၤ. သၢဘျီတဘျီန့ၣ် ကသ့ၣ်ယီၤမံလီၤဝဲလၢ ကျဲမုၢ်ခိၣ်လီၤ. ဖဲတၢ်မၤအသးတဘျီစုာ်စုာ်န့ၣ် စီၤဘံးလၣ်တီၢ်ဝဲ အကသ့ၣ်ယီၤလၢနီၣ်လဲာ်လီၤ.
ဘၣ်ဆၣ် ဖဲသၢဘျီတဘျီဝံၤအလီၢ်ခံန့ၣ် ယဟိဝၤယွၤမၤဝဲတၢ်လီၤလးအဃိ ကသ့ၣ်ယီၤတဲထီၣ်တၢ်လီၤ. ကသ့ၣ်ယီၤသံကွၢ်စီၤဘံးလၣ်လၢ– ‘ဘၣ်မနုၤအဃိ နတီၢ်ယၤလဲၣ်.’ စီၤဘံးလၣ်တဲဆၢက့ၤဝဲလၢ– ‘နမၤမဲာ်ဆှးယၤလီၤ. ခဲအံၤ နးမ့ၢ်အိၣ်လၢယစုပူၤန့ၣ် ယကမၤသံနၤလီၤ.’ ကသ့ၣ်ယီၤစံးဆၢက့ၤအီၤလၢ– ‘နဒိးယၤအိၣ်လံအနံၣ်ဖးယံာ်လံ. မ့ၢ်ယမၤနၤဒ်အံၤ တဘျီဘျီဧါ.’
ဝံၤဒီး ယဟိဝၤယွၤဒုးထံၣ် စီၤဘံးလၣ်လၢမူခိၣ်ကလူးလီၤ. မူခိၣ်ကလူးတဲဘၣ်အီၤလၢ– ‘ယဟိဝၤယွၤဟ့ၣ်ပလီၢ်နၤလၢ နတဘၣ်လဲၤဆိၣ်အၢပှၤအံၣ်စရ့လးဖိတဖၣ်ဘၣ်.’ စီၤဘံးလၣ်တဲဝဲလၢ– ‘ယမၤကမၣ်တၢ်လံ. ယကက့ၤကဒါက့ၤလၢ ယဟံၣ်လီၤ.’ ဘၣ်ဆၣ် မူခိၣ်ကလူးတဲအီၤလၢ– ‘နလဲၤလၢကီၢ်မိၤအးအပူၤသ့ ဘၣ်ဆၣ် နကဘၣ်တဲတၢ်ထဲ တၢ်လၢယဟိဝၤယွၤမၢနတဲန့ၣ်လီၤ.’
မ့ၢ်စီၤဘံးလၣ်ဒိကနၣ်ဝဲ ယဟိဝၤယွၤအကလုၢ်ဧါ. တဒိကနၣ်ဝဲဘၣ်. စီၤဘံးလၣ်ဂုာ်ကျဲးစၢးဆိၣ်အၢ ပှၤအံၣ်စရ့လးဖိသၢဘျီညါ. ဘၣ်ဆၣ် လၢတၢ်ဆိၣ်အၢအလီၢ်န့ၣ် ယဟိဝၤယွၤမၢ အဆိၣ်ဂ့ၤက့ၤဝဲ ပှၤအံၣ်စရ့လးဖိတဖၣ်ကိးဘျီဒဲးလီၤ. လၢခံကတၢၢ်န့ၣ် ပှၤအံၣ်စရ့လးဖိတဖၣ် လဲၤဒုးဝဲ ပှၤမိၤအးဖိဒီး စီၤဘံးလၣ်သံဝဲလီၤ. စီၤဘံးလၣ်မ့ၢ်ဒိကနၣ် ယဟိဝၤယွၤအကလုၢ်န့ၣ် တၢ်ကဟဲကဲထီၣ်အသးဒီးအီၤဒ်အံၤဧါ.
“ဟးဆှဲး တၢ်သးကွံကိးကလုာ်ဒဲးတက့ၢ်. အဂ့ၢ်ဒ်အံၤ, ပှၤကညီတဂၤ မ့ၢ်ထူးဝဲတီၤဝဲဆံးအါဆံးအါသနာ်က့ အဝဲအတၢ်အိၣ်မူနီၢ်နီၢ်န့ၣ်, တဘၣ်ဃးဘၣ်ဒီး တၢ်လၢအအိၣ်ဒီးအီၤသ့ၣ်တဖၣ်န့ၣ်ဘၣ်.”—လူၤကၣ် ၁၂:၁၅, ခ့ခါစှီၤကျိာ်
