Maisilaele sebabile mwa lihalaupa ka lilimo zebato eza 40. Bahapile mileneñi yemaata yemiñata. Cwale hase batibelezi mwa mabala a Moabi, ili wiko wa Nuka ya Jordani, neli nako ya kuli bakene mwa Naha ya Sepiso. Balaki, mulena wa Moabi, naaikalezwi kuli naaka amuhiwa naha ki Maisilaele. Kacwalo, abiza muuna yabizwa Balaami kutaha kwa Moabi kuli ato kuta Maisilaele.

Kono Jehova abulelela Balaami kuli: ‘Hauswaneli kukuta Maisilaele.’ Kacwalo, Balaami ahana kuya. Mulena Balaki amumema hape lwabubeli mi amusepisa kumufa lika kaufela zanaaka bata. Nihakulicwalo, Balaami ahana kuya. Cwale Mulimu ali: ‘Wakona kuya kono uyo bulela feela zenika kubulelela.’

Balaami anga mbongolo yahae ni kuliba kwa mboela wa Moabi. Naalelile kuyo kuta Maisilaele nihaike kuli Jehova naamutaluselize kuli asike aeza cwalo. Lingeloi la Jehova nelibonahezi mwa nzila halaalu. Balaami naasika bona lingeloi, kono mbongolo yahae yona nei libona. Sapili, mbongolo yazwa mwa nzila ni kuya mwa simu. Hasamulaho, mbongolo yaisika kwa limota mi yapyatela lihutu la Balaami kwa limota. Kwa mafelelezo, mbongolo yabuta fahalaa nzila. Mwa muinelo wo kaufela, Balaami naanatanga mbongolo ka mulamu.

Taba yeo hase iezahalile lwabulaalu, Jehova atahisa kuli mbongolo ibulele. Mbongolo yabuza Balaami yali: ‘Ki kabakalañi hauzwelapili kuninata?’ Balaami alaba kuli: ‘Kakuli uniboni bukuba. Nenika kubulaya kambe ninani mukwale.’ Mbongolo yaalaba kuli: ‘Unizulami ka lilimo zeñata. Kana nikile nakueza cwana?’

Cwale Jehova atahisa kuli Balaami abone lingeloi. Lingeloi lali: ‘Jehova nakulemusize kuli usike wakuta Isilaele.’ Balaami kihaa li: ‘Nifosize. Nakuta kwa ndu.’ Kono lingeloi lali: ‘Wakona kuya kwa Moabi, kono uyo bulela feela zakakutaluseza Jehova kuli uyo bulela.’

 Kana Balaami naaitutile tuto? Batili. Hasamulaho, Balaami naalikile kukuta Maisilaele kono nako kaufela hanaaezanga cwalo, Jehova naatahisize kuli abafuyaule mwa sibaka sakuba kuta. Kwa mafelelezo, Maisilaele bataseza naha ya Moabi, mi Balaami ni yena naabulailwe. Kaniti, nekukaba hande kambe Balaami naateelelize ku Jehova kwa makalelo.