Haniyi mpinji aIsarela adiña anashakami dehi yaaka kwakwihi na 40 mwisaña. Ashindili nyisumba yayivulu yakola. Dichi, chashakaminiwu muyana yaMowabi kumusela waKaloña Yodani, mpinji yakwiñila Mwituña daChikaninu yashikili. Balaki, mwanta wakuMowabi, watiyili woma nindi akumutambula ituña dindi. Dichi watambikili iyala wejina daBalami kulonda enzi kuMowabi nakuyishiña aIsarela.

Ilaña Yehova wamulejeli Balami nindi: ‘Bayi wuyishiña aIsarelaku.’ Dichi Balami wakaanini kuya. Mwanta Balaki wamutambikili kamuchiyedi nakumushiika nindi wakamwinka chuma chejima chakakeñayi. Hohamu Balami wakaanini. Nzambi wahosheli nindi: ‘Yaña, ilaña wakahoshaña hohu mazu inakakuleja nami hoshaku.’

Balami wakandamini hachimbuulu chindi nawa watachikili kuya kukabeta kakuchidiilu kuMowabi. Watoñojokeleña kuya nakuyishiña aIsarela, hela chakwila Yehova wamukaanishili kwila chumichi. Kañelu kaYehova wamwekeni kapampa kasatu munjila. Balami hamumweneña iwu kañeluku, ilaña chimbuulu chindi wamumweneña kañelu. Hakusambila chimbuulu wafumini munjila nakuya mwisaña. Kuhiñahu wayili kumbañu yamalola nawa washintakesheleli mwendu waBalami kumbañu. Nkumininaku, chimbuulu wafukamini heseki hakachi kanjila. Hanaka kapampa kejima kasatu, Balami wamweteleña namutondu.

Hanyima yakapampa kamuchisatu, Yehova wamuletesheli chimbuulu kuhosha. Wamwihwili Balami nindi: ‘Muloñadi chiwunatwalekelihu nakuñeta?’ Balami waakwili nindi: ‘Muloña wunammwekeshi kwikala chisupi. Neyi nadiña nampoku kachi nakujahi.’ Chimbuulu wamwilili nindi: ‘Wunendeli hadi ami yaaka yayivulu. Nakukoñahu dehi chuma chamuchidiwu?’

Kuhiñahu Yehova wamukojejeli Balami kumumona kañelu. Kañelu wamwilili nindi: ‘Yehova wakulejeli nindi bayi wushiña aIsarelaku.’  Balami wahosheli nindi: ‘Naluwañesha. Nukufunta kwitala.’ Hela chochu, kañelu wamulejeli nindi: ‘Yaña kuMowabi, ilaña wakahosha hohu yuma yakakulejayi Yehova nindi wuhoshi.’

Komana Balami wadizililiku? Inehi. Hanyima yachumichi, Balami wakeñeleña kuyishiña aIsarela kapampa kasatu, ilaña mpinji yejima yakeñeleñayi kuyishiña Yehova wamuletesheleña ayikiswili. Nkumininaku, aIsarela ayilukukili aMowabi nawa Balami amujahili. Neyi Balami wamutiyilili Yehova wadi kufwa wanyi.