Jo-Israel koro nosebedo e thim kuom higni ma hawo 40. Ne giseloyo taonde mang’eny. Koro ne gin e pewe mag Moab yo ugwe mar Aora Jordan ka giikore donjo e Piny ma Nosingi. Balak ruodh Moab ne luor ni Jo-Israel ne dhi maye pinye. Omiyo, noluongo ng’at moro ma ne nyinge Balaam mondo okuong’ne Jo-Israel.

To Jehova nokwero Balaam kama: ‘Kik itemie kuong’o Jo-Israel.’ Mano nomiyo Balaam otamore dhi ir Balak. Ruoth Balak noluonge kendo. Ruodhno nosingone ni ne odhi chule gimoro amora ma nonyalo dwaro, tek mana ni okuong’o Jo-Israel. Kata kamano, Balaam pod notamore dhi. Kae to Nyasaye nonyiso Balaam niya: ‘Inyalo dhi adhiya, en mana ni nyaka iwach mana gima an e ma anyisi.’

Balaam ne omako wuoth ma dhi Moab koidho pundane. Ne ochano mar kuong’o Jo-Israel, kata obedo ni Jehova ne osekwere. Malaika mar Jehova ne obiro mochung’ e wang’ yo didek. Balaam ne ok ne malaikano, to pundane to ne nene. Pundano nokwongo obaro e i puodho moro. Bang’e, pundano notemo wuotho kodiyore e kor kite ma ne ochielgo bath yo, kendo mano nomiyo tiend Balaam ohinyore. Gikone, pundano nonindo piny e chuny yo. E sechego te, Balaam ne chwado pundano gi kede.

Kae to Jehova nomiyo pundano owuoyo. Pundano nopenjo Balaam kama: ‘Ang’o momiyo irodha malich kama?’ To Balaam nodwoke niya: ‘Ang’o momiyo itima ka ng’ama ofuwo? De abed gi ligangla, dine anegi.’ Pundano nodwoke kama: ‘Donge asebedo ka ating’i kuom higni mang’eny. Be asegatimi kama adier?’

Kae to Jehova noyawo wang’ Balaam, mi Balaam oneno malaikano. Malaikano nopenje kama: ‘Donge Jehova nokweri ni kik idhi ikuong’ Jo-Israel?’ Balaam nodwoko niya: ‘Asetimo marach. We adog thurwa.’  To malaikano nowacho: ‘Inyalo dhi adhiya, en mana ni nyaka iwach mana gima Jehova e ma onyisi.’

Be gik ma notimorego nomiyo Balaam puonj moro amora? Ooyo. Bang’ wechego, Balaam pod notemo kuong’o Jo-Israel nyadidek, to nyadidekgo te Jehova nomiyo Balaam oguedho Jo-Israel kar kuong’ogi. Bang’e, Jo-Israel ne omonjo Moab, kendo Balaam ne onegi. Donge weche dine odhi ne Balaam maber ka dine owinjo Jehova?