Bann Izraelit ti res dan dezer pandan apepre 40 an. Zot ti gagn laviktwar lor plizir lavil. Asterla, zot pe res dan laplenn Moab, ki trouv dan les Larivier Zourdin, ek inn ariv ler pou ki zot rant dan Later Promiz. Balak, lerwa Moab, ti per tansion bann Izraelit pran so pei. Alor, li ti invit enn zom ki ti apel Balaam pou vinn Moab ek pou donn bann Izraelit malediksion.

Me Zeova ti dir Balaam: ‘Fode pa to donn bann Izraelit malediksion.’ Alor, Balaam pa ti ale. Lerwa Balak ti invit Balaam enn deziem fwa ek ti promet pou donn li tou seki li anvi. Me kanmem sa, Balaam pa ti ale. Lerla, Bondie ti dir Balaam: ‘To kapav ale, me to pou kapav dir zis seki mo pou dir twa dir.’

Balaam ti mont lor so bourik ek li ti al Moab. Li ti pe al laba pou donn bann Izraelit malediksion, mem si Zeova ti dir li pa fer sa. Lor sime, enn anz Zeova ti aparet trwa fwa. Balaam pa ti kapav trouv sa anz-la, me so bourik ti trouv li. Premie kout ki anz-la ti aparet, bourik-la ti kit so sime ek li ti rant dan enn karo. Deziem kout-la, bourik-la ti pas pre ar enn miray an ros ek li ti kwins lipie Balaam. Ek trwaziem kout-la, li ti asiz lor so kat lapat omilie sime. Ek sak fwa, Balaam ti bat bourik-la avek enn baton.

Apre trwaziem kout-la, Zeova ti fer bourik-la koze. Bourik-la ti demann Balaam: ‘Kifer to pe bat mwa?’ Balaam ti reponn: ‘To pe fer mwa pas pou enn bet. Si mo ti ena enn lepe, mo ti pou touy twa.’ Lerla, bourik-la ti dir li: ‘Mo to bourik depi plizir lane. Eski mo finn deza tret twa koumsa?’

Lerla, Zeova ti les Balaam trouv anz-la. Anz-la ti dir: ‘Zeova ti dir twa: fode pa to donn Izrael malediksion.’ Balaam ti reponn: ‘Seki mo’nn fer pa bon. Mo pou retourn kot mwa.’ Me anz-la ti  dir li: ‘To kapav al Moab, me to pou kapav dir zis seki Zeova pou dir twa dir.’

Eski Balaam ti konpran? Non. Apre sa, trwa fwa Balaam ti esey donn bann Izraelit malediksion. Me sak fwa Zeova ti fer Balaam beni zot. Alafin, bann Izraelit ti atak Moab, ek Balaam ti mor. Si depi koumansman mem Balaam ti ekout Zeova, eski sa pa ti pou pli bon pou li?