Enañin 40 iiõ kiiõ in an RiIsrael ro pãd ilo ãne jem̦aden im elõñ jikin ko em̦õj aer anjo̦ ioer. Tokãlik rar kajutak em̦ nuknuk ko aer ilo juon mel̦aaj ilo Moab me ej pãd turearin Reba Jordan. Kiiõ epaak iien eo ñan aer del̦o̦ñe Ãneen Kallim̦ur eo. Kiiñ eo an Moab etan Belak ear mijak ñe RiIsrael rein renaaj bõke ãneo ãneen. Innem ear kũrl̦o̦k Beleam im ba bwe en etal ñan Moab im ko̦o̦le RiIsrael ro. Juon eo ej ko̦o̦le ro jet ej kwal̦o̦k men ko renana me ekõn̦aan bwe ren wal̦o̦k ñan er.

Ak Jeova ear jiroñe Beleam im ba: ‘Kwõn jab ko̦o̦le RiIsrael ran̦.’ Kõn men in, Beleam ear jab etal. Ak Kiiñ Belak ear kũrl̦o̦k e bar juon alen im ear kallim̦ur ñane bwe enaaj lel̦o̦k jabdewõt men ekõn̦aan. Bõtab Beleam ear jab bar etal. Innem Anij ear ba ñane: ‘Kwõmaroñ etal, ak kwõn kõm̦m̦ane wõt men eo ij jiroñ eok bwe kwõn kõm̦m̦ane.’

Kõn men in, Beleam ear uwe ioon donkey eo nejin im jino etal ñan Moab. Ak ilo m̦ool, ear kõn̦aan etal im ko̦o̦le RiIsrael ro meñe Jeova ear ba ñane bwe en jab kõm̦m̦ane men in. Innem enjel̦ eo an Jeova ear jãde ilo ial̦ eo an Beleam jilu alen. Ak Beleam ear jab maroñ loe. Donkey eo wõt nejin ear maroñ loe enjel̦ in. Ilo iien eo kein kajuon, ke donkey in ear loe, ear jeorl̦o̦k jãn ial̦ eo im etal ñan juon mel̦aaj. Ilo iien eo kein karuo, ear dibõje juon wõrwõr im kaitaake neen Beleam. Innem ilo iien eo kein kajilu, ear babu wõt im jab m̦akũtkũt lowaan ial̦ eo. Ke donkey eo ear kõm̦m̦ani men kein, Beleam ear deñõte kõn juon al̦al̦.

Ãlikin iien eo kein kajilu, Jeova ear kõm̦m̦an bwe donkey in en maroñ kõnnaan. Donkey in ear kajjitõk ippãn Beleam im ba: ‘Etke kwõl̦ak kar deñõt ña?’ Beleam ear uwaak im ba: ‘Kõnke kwõj likũt ña bwebwe. Ñe in kar bõktok jãje eo aõ, kwõnaaj kar mej.’ Innem donkey in ear ba: ‘Ejjab ña donkey eo kwaar uwe ioon ium̦win elõñ iiõ ko m̦aantak ke? Inañin ke kar kõm̦m̦an ãindein ñan kwe?’

Innem Jeova ear kõm̦m̦an bwe Beleam en loe enjel̦ eo. Enjel̦ in ear ba ñane: ‘Jeova ear ba ñan kwe bwe kwõn jab ko̦o̦le RiIsrael ran̦.’ Im Beleam  ear ba: ‘Iar jerawiwi. Inaaj ro̦o̦l ñan ijo jikũ.’ Ak enjel̦ in ear ba: ‘Kwõn etal wõt ñan Moab, ak kwõn ba wõt men ko Jeova ej jiroñ eok bwe kwõn ba.’

Beleam ear ke katak jãn men in ear wal̦o̦k ñane? Ear jab. Ãlikin iien eo, ear kajjioñ ko̦o̦le RiIsrael ro jilu kõttan. Ak kajjojo iien ear kõm̦m̦ane men in, Jeova ear ukote naan ko an Beleam bwe en kõjeraam̦m̦ane er. Tokãlik RiIsrael ro rar tarin̦ae ippãn RiMoab ro, im Beleam ear mej. Em̦m̦anl̦o̦k ñe Beleam en kar roñjake Jeova.