TLAMACHTILI 28
Balaam iburro kamanaltik
Israeleuanij itstoyaj nechka 40 xiuitl ipan uaktok tlali. Ya moaxkatijtoyaj miak altepemej. Itstoyaj ipan nopa tlamayamitl tlen Moab, uan nechka kalakiskiaj ipan nopa tlali tlen toTeotsij kinmakaskia. Balac, katli tlanauatiyaya ipan Moab, kinmakasiyaya israeleuanij pampa moiljuiyaya kinekiyayaj kinteuisej. Yeka kinotski se tlakatl tlen itokayaya Balaam, pampa kinekiyaya ma kintelchiua israeleuanij.
Uajka Jehová kiiljuik Balaam: “Amo xikintelchiua israeleuanij”. Yeka Balaam amo kinejki yas. Tlanauatijketl Balac sampa kinotski, uan maske kiiljuik kimakaskia nochi tlen ya kinekiskia, Balaam amo kinejki yas. Teipa Jehová kiiljuik: “Kena uelis tias, uan moneki tikijtos san tlen na nimitsnauatis”.
Uajka Balaam tlejkok ipan iburro uan yajki Moab. Maske Jehová kiiljuijtoya san kiijtoskia tlen ya kinauatiskia, Balaam kena kinekiyaya kintelchiuas israeleuanij. Uajka Jehová kititlanki se iluikaejketl uan expa monextik ojtipa. Maske Balaam amo ueliyaya kiita nopa iluikaejketl, iburro kena kiitayaya. Achtoui, iburro moikankuepki uan kalakito ipan se mili. Teipa, nopa burro mokaltechok ipan se tepamitl uan kiikxikuapitstlak Balaam. Uan ika expa, nopa burro motejki tlajkoojtli. Yeka Balaam kimakiliyaya iburro ika se kuauitl.
Uajka Jehová kichijki nopa burro ma kamanalti. Nopa burro kiiljuik Balaam: “¿Kenke tinechuiteki?”. Balaam kinankilik: “Pampa tinechpinaualtijtok. Tlaj nijpiaskia se espada, nimitsmiktiskia”. Uan iburro kinankilik: “Miak xiuitl nimitsnemiltijtok, ¿ipa kej ni nijchiua?”.
Uajka Jehová kichijki Balaam ma kiita nopa iluikaejketl. Nopa iluikaejketl kiiljuik: “Jehová mitsiljuik amo xikintelchiua israeleuanij”. Balaam kinankilik: “Nitlajtlakolchijtok. Nimokuepas nochaj”. Nopa iluikaejketl kiiljuik: “Kena uelis tias Moab, uan tikijtos san tlen toTeotsij mitsiljuis”.
¿Timoiljuia Balaam kichijki tlen kiiljuijkej? Amo. Pampa teipa Balaam expa kinejki kintelchiuas israeleuanij. Maske kiampa kinekiyaya kichiuas, Jehová kichijki ma kinteochiua. Teipa, israeleuanij kinteuijkej katli euayayaj Moab, uan Balaam nojkia mijki. Tlaj Balaam kineltokatoskia Jehová, ¿kipanotoskia nopa?
“Xijpiakaj cuidado para amo xijnekikaj nochi tlamantli tlen onka, pampa axaka kipantis yolistli tlen yankuik pampa kipia miak tlamantli para iaxka” (Lucas 12:15).
