Israelitas kiajxitijtoyajya 40 xiujmej itech taluakyan. Kintankajya miak altepemej. Axkan kitalijkaj inintakenkaluan itech talmej tein pouiaj Moab, itonalkisayampa ueyiat Jordán, uan amo uejkaua kalakiskiajya itech Tal tein Dios motenkaujka kinmakas. Balac, akin tekiuajtia Moab, mouia maj israelitas kikuilianij ital. Yejua ika kiluij se takat akin motokaytiaya Balaam maj yani Moab uan maj kijtouani chikauak maj israelitas kinpano tein amo kuali.

Sayoj ke Jiova kiluij Balaam: “Amo xikijto maj israelitas kinpano tein amo kuali”. Yejua ika Balaam amo kinekik yas Moab. Tekiuaj Balac oksepa kiyoleuak uan motenkauak kimakas tein yeski tein kinekiskia, sayoj ke Balaam oksepa amo kinekik yas. Ompa Dios kiluij: “Nimitskaua xiyouj. Maski sayoj uelis tikijtos tein nejua nimitsiluis”.

Balaam yajki Moab itech iburra. Yejua kinemiliaya kijtos maj israelitas kinpano tein amo kuali, maski Jiova kiluijka maj amo kichiua. Iángel Jiova expa monextij itech ojti. Balaam amo kiitaya ángel, sayoj ke iburra kemaj kiitaya. Yekinika, burra kinekik tayoualos uan kalakik tetalpan. Ompa, moteltokij itech se tepamit uan peuak kimetsnatskualtia Balaam. Ika tamik, burra motekak tatajko ojti. Nochi expa, Balaam kiuitekia ika se kouit.

Satepan, Jiova kichiuak maj burra tajto. Burra kitajtanij Balaam: “¿Keyej tinechuiteki?”. Balaam kinankilij: “Porin tikchiua maj nimoita ke amo nitamati. Komo nikpiaskia se espada, nimitsmiktiskia”. Burra kiluij: “Miak xiujmejya timopantaliani nopanko. ¿Kemansa ijkon nimitschiujka?”.

Ijkuak, Jiova kikauak Balaam maj kiita ángel. Nejon ángel kiluij: “Jiova mitsnauatij amo xiyouj xikijtoti maj Israel kipano tein amo kuali”. Balaam tanankilij: “Nimopoloj. Nimokepati nochan”.  Sayoj ke ángel kiluij: “Uelis tiyas Moab, maski sayoj uelis tikijtos tein Dios mitsiluis”.

¿Tiknemilia ke Balaam kiajsikamatik tein monekia kichiuas? Amo, porin satepan expa kitemoj kijtos chikauak maj Israel kipano tein amo kuali. Sayoj ke, nochi expa, Jiova kichiuak maj kijtouani se tatiochiualis uan amo tein amo kuali. Ika tamik, israelitas kintankej akin kayomej Moab, uan Balaam kimiktijkej. ¿Melauj ke okachi kuali yeskia maj Balaam kichiuani tein Jiova yekinika kinauatij?