Aaisraeli oya li ya kala mombuga omimvo 40 lwaampo. Oya sindi iilando oyindji iinankondo. Sho ya li ya yunga oontanda momalushandja gaMoab kuuzilo womulonga gwaJordan, olya li ethimbo lyawo lyokuya mEvi lyEuvaneko. Omukwaniilwa gwaMoab, gwedhina Balak, okwa li a tila kutya pamwe Aaisraeli otaya ka yuga ko oshilando she. Onkee ano, okwa hiya omulumentu gwedhina Bileam e ye kuMoab a thinge Aaisraeli.

Jehova okwa lombwele Bileam a ti: ‘Ino thinga Aaisraeli.’ Onkee ano, Bileam okwa tindi okuya kuMoab. Omukwaniilwa Balak okwa hiya Bileam oshikando oshitiyali nokwe mu uvanekele oku mu pa kehe shoka a hala. Natango Bileam okwa tindi. Opo ihe Kalunga okwa ti: ‘Oto vulu okuya, ihe popya owala shoka tandi ku lombwele.’

Bileam okwa kayile okasino ke nokwa yi u uka kuuninginino kuMoab. Okwa li a tokola oku ka thinga Aaisraeli, nonando Jehova okwe mu lombwela kee shi ninge. Omuyengeli gwaJehova okwa holoka mondjila ye lwiikando itatu. Bileam ka li ta vulu okumona omuyengeli, ihe okasino ke oka li ke mu wete. Tango, okasino oka peguka mo mondjila ku uka mepya. Oki iwegenyene kekuma e taka thengenyene Bileam kompadhi. Hugunina, okasino oka lala mokati kondjila. Oshikando kehe, Bileam okwa dhenge okasino noshitago.

Konima yoshikando oshititatu, Jehova okwa ningitha okasino ka popye. Okasino oka pula Bileam ka ti: ‘Oto dhengele ndje shike?’ Bileam okwa ti: ‘Ngoye oto ningi ndje egoya, ando onda li ndi na egongamwele, ando otandi ku dhipaga.’ Okasino oka ti: ‘Owa kayile ndje omimvo odhindji. Onde ku ningile nale ngeyi?’

Opo ihe, Jehova okwa tonatitha omeho gaBileam e ta mono omuyengeli. Omuyengeli okwa ti: ‘Jehova okwe ku londodha waa thinge Aaisraeli.’ Bileam okwa yamukula a ti: ‘Onda yona, otandi shuna kegumbo.’ Omuyengeli okwe mu lombwele a ti: ‘Oto vulu okuya kuMoab, ihe oto ka popya owala shoka Jehova te ku lombwele.’

 Mbela Bileam okwa li ngaa i ilonga oshilongwa? Aawe. Konima yaashono Bileam okwa kambadhala okuthinga Aaisraeli iikando itatu, ihe iikando ayihe mbyoka, Jehova okwe mu ningitha e ya yambeke. Lwahugunina, Aaisraeli oya ponokele Moab, na Bileam okwa dhipagwa. Mbela ando Bileam okwa pulakenene kuJehova petameko, ando inashi mu endela nawa?