Aisarayeli yaamaliha iyaakha 40 ekhalaka mutakhwani. Awo yaavootha ipooma sincipale soolipa. Ohoolo waya, yaahaya va mureyareya wa Mowape waacamela Muhice Yortano ehalaka vakhaani ovolowa mu Elapo ya Nlakano. Mwene o Mowape awiichaniwa Palaki, aanoova wi Aisarayeli yaahaala omwaakha elapo awe. Mwawiihiiha, aanwopa mulopwana awiichaniwa Palamu wi awuulumele Aisarayeli.

Nto Yehova aaloca wa Palamu: ‘Ohiwuulumele achu awo.’ Mwawiihiiha Palamu aakhooca oyawo. Mwene Palaki aanwopa wanaawiili nave aamuroromeliha omvaha echu eereiye aveke. Nto Palamu aakhooca. Muluku aaloca: ‘Ocimule ni yaawo nto weere pahiru yeeyo kineeraaka koothoonyere.’

Palamu aanwela puuru awe ayaaka o Mowape. Owo aahuupuwela owuulumela Aisarayeli naamwi Yehova aamulenle wi ahereno. Munkeelo a Yehova aaheemela mu mphiro ikwaha raru. Palamu hawerya omoona munkeelo, nyenya puuru awe aanamoona. Woopaceryani puuru aahiya mphiro ahapuwela mutakhwani. Voocharela aawomaanya mweco wa Palamu ni exiri ya maluku. Vookuchulani aakona veeri va mphiro. Mu ikwaha sooraaru Palamu annammana puuru ni ekopo.

Ohoolo waya, Yehova aaheeriha wi puuru aloce. Puuru aamukoha Palamu: ‘Tiheeni kiwerenlaaka?’ Palamu aahaakhula: ‘Weyaano wookiphuca! Kiiha kirino nsipaaca kanwiipha.’ Voocharela puuru aahaakhula: ‘Oniru hiiha miyaano ka puuru aa, yoole mahiku oothene onanwelaawe ophiyerya olelo. Akhweya kookhovelela weera hiiha ni weyaano?’

Vano Yehova aamweeriha wi Palamu amoone munkeelo. Munkeelo aahi: ‘Yehova ohooleela wi ohiwuulumele Aisarayeli.’ Palamu aahaakhula: ‘Koocheka, nto nkaasuwela wi weemenle mu rampha  ohoolo waka. Kinamukookela owaani.’ Nyenya munkeelo aahi: ‘Waahoole achu ala; nto waloce pahi masu kinayaaka wooleeliha.’

Apwanne Palamu aahuseryavo echu? Hooye. Aavinyaleiye, Palamu aaheererya owuulumela Aisarayeli ikwaha raru, nyenya Yehova aamweeriha wi aareelihe. Moovira wa elukuluku, Aisarayeli yaamutoloxa Mowape nave Palamu aahiiphiwa. Apwanne hoki okhale waphaama waakhanle wi Palamu oomwiiwelela Yehova?