Israelitas ikuikayaj kanaj 40 xiuitl ipan tlaluaktli. Yonotlatkitijkaj miyek kalpamej. Onokajkaltijkej ipan tlalmantli Moab, ikisayan tonajli itech atentli Jordán. Sa achijtsin poliuiya ika kalakiskiaj ipan tlajli tlen yokimijlikaj kinmakaskej. Balac, tekiuaj itech Moab, nomojtiaya tla kikuiliskiaj itlaluan. Kuakon, okinots se tlakatl itoka katka Balaam mauiya Moab makinuijuikaltiti israelitas, noso makimijli ika xkuajli tlen inpan nochiuas.

San ika, Jehová okijli Balaam: “Xkipiya ika tikinuijuikaltis israelitas”. Kuakon Balaam xokinek yas. Tekiuaj Balac okinots ika okpa niman okijli ika kimakaskia nochi tlen kinekiskia. Maski ijkon, Balaam xokinek yas. Kuakon toTajtsin okijli: “Uelis tias, san ika, san tikijtos tlen nimitsijlis”.

Balaam oyaj Moab ipan ipoloko. Yejua yokinemilijka kinuijuikaltis israelitas maski Jehová yokijlika maka makichiua. Iiluikaktekitkauj Jehová yexpa ouajnonexti ipan ojtli. Balaam xkitaya iluikaktekitketl, san ika, ipoloko kema. Kachtopa, poloko okis itech ojtli niman oksekan oyaj. Sakin, poloko onopepecho itech tepantli niman okiikxipatlacho Balaam. Sa ika ontlami, poloko sa ouajnotekak ipan ojtli. Balaam kiuitekiya ipoloko ika se tlakotl ijkuak ijkon kichiuaya.

Sakin, Jehová okichiuj ika poloko matlajto. Poloko okitlajtolti Balaam: “¿Tleka tinexuiteki?”. Balaam okinankili: “Yotinechpinaujti. Tla nikpiyaskia se espada nimitsmiktiskia”. Poloko okijli: “Ikipiya miyek xiuitl ika nimitsmamajtinemi. ¿Kemantika ijkon yonimitschiuilijka?”.

Kuakon Jehová okikauili ika Balaam makita iluikaktekitketl. Iluikaktekitketl okijli: “Jehová omitsijli maka xkuijuikalti kalpan Israel”. Balaam okinankili: “Oninopopolo. Ninokuepas nochan”. San ika, iluikaktekitketl okijli: “Uelis tias Moab, san ika, san tikijtos tlen Jehová mitsijlis”.

 ¿Onomachti itlaj Balaam itech tlen okijlikej? Ka. Yexpa okiyejyeko kiuijuikaltis kalpan Israel, san ika, Jehová okichiuj yexpa makiteochiua. Sakin, israelitas okixnamijkej Moab niman Balaam omik. ¿Xmelak ika kuajli yeskia tla Balaam nimantsin kitlakamatiskia Jehová?