No arakhagö 40 fakhe me no so ndraono Gizaraʼeli ba danö si mate. No oya mbanua si no lakalaisi. Iadaʼa, lataruʼö nosera ba danö Moabi, tanö ba gatumbukha Nidanö Yoridano. Lö ara tö larugi Danö Amabuʼula. Ataʼu Mbalaki, razo Moabi na larabu mbanuania. Börö daʼö, ikaoni samösa ndra matua sotöi Bileamo enaʼö möi ia ba Moabi ba wangelifi iraono Gizaraʼeli.

Imane Yehowa khö Mbileamo, ’Tebai öʼelifi ndraono Gizaraʼeli.’ Tobali, lö mofanö Mbileamo. Ifuli zui ikaoni ia Razo Balaki, ifabuʼu wa ibeʼe gofu hadia manö zomasi Mbileamo. Hizaʼi, lö omasi Mbileamo. Aefa daʼö, imane Lowalangi, ’Tola möiʼö, hizaʼi hadia zi no ufatunö khöu ha daʼö zi tola öwaʼö.’

Mofanö Mbileamo ba Moabi itörö galide. Iʼalui lala ba wangelifi iraono Gizaraʼeli hewaʼae no itegu ia Yehowa. Tölu kali iforomaʼö ia malaʼika Yehowa ba lala. Lö oroma khö Mbileamo malaʼika daʼö, hizaʼi iʼila kalidenia. Si oföna, iholeʼö ia kalide andrö numalö ba nowi. Aefa daʼö, fakitö galide andrö ba dowa irege tolazi gahe Mbileamo. Ba gafuriata, telögu ba lala galide andrö. Iböbözi galidenia Bileamo faoma siʼo.

Me no aefa tölu kali ibözi, fahuhuo khönia galide. Börö Yehowa wa tola fahuhuo galide andrö, imane khö Mbileamo, ’Hana wa lö öböhöli wamözi yaʼo?’ Imane Bileamo, ’Öbaliʼö niha si bodo ndraʼo. Na so khögu wöda ba daʼa menaʼö ba no ubunu ndraʼugö.’ Imane kalide andrö, ’No fakudo ndraʼugö khögu ba zi hauga fakhe. Hadia no irai ufalua khöu zimane daʼa?’

Aefa daʼö, iforomaʼö Yehowa khö Mbileamo malaʼika daʼö. Imane malaʼika andrö, ’No itegu ndraʼugö Yehowa ba wangelifi iraono Gizaraʼeli.’ Imane Bileamo, ’Fasala ndraʼo, mangawulido.’ Imane khönia malaʼika andrö, ’Tola möi ndraʼugö ba Moabi, hizaʼi hadia zi no ifatunö khöu Yehowa ha daʼö zi tola öwaʼö.’

 Hadia iʼoʼö Bileamo? Löʼö. Me no aefa daʼö, iʼalui lala Bileamo ba wangelifi iraono Gizaraʼeli tölu kali. Hizaʼi ibaliʼö howu-howu daʼö Yehowa ba ndraono Gizaraʼeli. Ba gafuriata lasuwö Moabi iraono Gizaraʼeli ba mate Mbileamo. Na iʼoʼö Bileamo niwaʼö Yehowa iʼotarai wamobörö, tatu abölö sökhi lua-luania lö?