Go be go šetše mengwaga e sego kae gore Baisiraele ba fetše mengwaga e 40 ba dula lešokeng. Ba be ba fentše batho ba metseng e mentši e megolo. Ga bjale ba be ba dula melaleng ya Moaba ka bohlabela bja Noka ya Jorodane, gomme ba le kgauswi le go tsena Nageng ya Kholofetšo. Balaka e lego kgoši ya Moaba, o be a tšhogile ka ge a be a nagana gore Baisiraele ba tlo mo amoga naga ya gagwe. Ka gona a kgopela monna yo a bitšwago Bileama gore a tle nageng ya Moaba go tlo roga Baisiraele.

Eupša Jehofa o ile a re go Bileama: ‘O se ke wa roga Baisiraele.’ Ka gona Bileama a gana go ya Moaba. Kgoši Balaka a kgopela Bileama la bobedi gore a tle a roge Baisiraele, e bile a mmotša gore o tla mo lefa ka selo se sengwe le se sengwe. Bileama a gana gape. Eupša Modimo a re go yena: ‘Sepela, eupša o bolele feela seo ke tlago go go botša sona.’

Bileama a namela pokolo ya gagwe gomme a ya nageng ya Moaba. O be a ipoditše gore o yo roga Baisiraele, le ge Jehofa a be a mmoditše gore a se ke a ba roga. Morongwa wa Jehofa o ile a tšwelela gararo tseleng yeo Bileama a bego a sepela go yona. Bileama o be a sa mmone, eupša pokolo ya gagwe yona e be e mmona. Ge morongwa yoo a tšwelela la mathomo, pokolo yeo e ile ya tšwa tseleng gomme ya leka go tsena ka tšhemong. Lekgeng la bobedi, pokolo yeo e ile ya sepela kgauswi le leboto la maswika, gomme ya pataganya leoto la Bileama le leboto. Mafelelong, pokolo yeo e ile ya patlama fase gare ga tsela. Makgeng ao ka moka a mararo, Bileama o be a betha pokolo yeo ka lepara.

Ka morago ga lekga la boraro, Jehofa o ile a dira gore pokolo yeo e bolele. E ile ya botšiša Bileama ya re: ‘Ke ka baka la eng o duletše go mpetha?’ Bileama a e araba a re: ‘Ke ka gobane o ntira setlaela. Ge nkabe ke swere thipa, nkabe ke go bolaile.’ Pokolo yeo ya re: ‘Ke kgale o nnamela. Eupša na nkile ka go dira tše ke go dirilego tšona lehono?’

Ke moka Jehofa a dira gore Bileama a bone morongwa yola. Morongwa yoo a re go Bileama: ‘Jehofa o go boditše gore o se ke wa ya go roga  Baisiraele.’ Bileama a re: ‘Ke dirile phošo. Ke tla boela gae.’ Eupša morongwa yoo a re: ‘Sepela o ye Moaba, eupša o bolele feela seo Jehofa a tlago go go botša sona.’

Na Bileama o ile a thoma go kwa Jehofa? Aowa, ga se a ka a mo kwa. Ge a fihla Moaba, o ile a leka go roga Baisiraele ka makga a mararo, eupša nako e nngwe le e nngwe ge a ba roga, Jehofa o be a dira gore a ba šegofatše. Mafelelong, Baisiraele ba ile ba hlasela Bamoaba gomme Bileama le yena a bolawa ntweng yeo. Bileama nkabe a ile a kwa Jehofa go tloga mathomong. Wena o nagana eng?