Kʼadę́ę 40 nááhaigo Ízrel dineʼé honoojítahdi tázhdínééh. Tʼóó ahayóí kin dah naazhjaaʼgo yikʼeh dadeesdlı̨́ı̨́ʼ. Ízrel dineʼé dah náádiiʼnáago Jórdan Tooh nílíní haʼaʼaahjígo Móʼab kéyah dzígaigi niníná, áko kʼad éí kéyah haa deetʼánígíí biih jookai. Móʼab dineʼé binaatʼáanii Béílak hakéyah haghaiideetʼáahgo tʼóó bił yééʼ hazlı̨́ı̨́ʼ. Áko hastiin Béílam wolyéii Móʼabgóó yíká iʼííłʼaʼ, Ízrel dineʼé shá bidiníídzįįł hałní.

Ndi Jiihóvah éí Béílam ííłní: ‘Ízrel dineʼé doo bidíníídzįįł da.’ Áko Béílam kéyahgóó tʼáadoo deeyáa da. Naatʼáanii Béílak náánágo yíká iʼííłʼaʼ dóó kóní, tʼáá ní nínízinígíí náádeeshłééł. Ndi, Béílam doo íiznízin da. Ńtʼééʼ God ání: ‘Nílááh, ndi saad bee nichʼįʼ hahasdziihígíí tʼéiyá biʼíínísin doo.’

Béílam bitélii bił dah diidlóózh dóó shádiʼááhjígo Móʼab bikʼijigo dah diiyá. Azhą́ Jiihóvah dooda biłníi ndi Ízrel dineʼé hódinéesdzįįł nízin. Atiingi, Jiihóvah bidiyingo naalʼaʼí táadi ííshjání áníʼdiilyaa. Béílam éí diyingo naalʼaʼí tʼáadoo yiyiiłtsą́ą da, ndi télii éí iiłtsą́. Áko télii éí atiin kʼeeʼąą haaldloozhgo tʼáá áhoodzaago niheeldloozh. Áádóó télii éí tsé yistłʼinígíí yaah deeyáago tsé bikʼijįʼ Béílam bikeeʼ yishjizh. Télii éí doo náásgóó bíniʼ da. Éí biniinaa Béílam éí télii gish yee néineesxaal.

Táadi azlı̨́ı̨́ʼ góneʼ, Jiihóvah éí télii hayííłdzííʼ. Télii éí Béílam ííłní: ‘Haʼátʼíísh biniinaa náshiníníłhaal?’ Béílam ání: ‘Tʼóó shá nahółtʼiʼ. Diltłish łaʼ naashtingo éí nidiyeeshxééł ńtʼééʼ.’ Télii ání: ‘Ląʼí nááhai tándíshyéehgo, łahdaásh tʼáá nichʼįʼ nahwisiiyiłnaaʼ?’

Áadi índa Jiihóvah éí Béílam, diyingo naalʼaʼí jiiłtsą́ągo áhoolaa. Diyingo naalʼaʼí áháłní: ‘Jiihóvah tʼáá bítséedi Ízrel  doo bidínóodzįįł da dííniid.’ Béílam ání: ‘Ádił asésiih. Tʼóó tʼą́ą́ʼ nihéédeeshdááł.’ Ndi diyingo naalʼaʼí ání: ‘Nílááh, Móʼabgóó yínáał, ndi Jiihóvah nił halneʼígíí tʼéiyá bee hahídziih doo.’

Béílamísh akʼídiitą́? Ndagaʼ. Béílam éí Ízrel táadi chʼééh bizhnídzin. Ndi Jiihóvah éí Béílam, Ízrel tʼóó bikʼijisdliʼgo áyiilaa. Áko Ízrel dineʼé Móʼab yikʼiijééʼ, dóó Béílam dayiisxı̨́. Béílam éí Jiihóvah bikʼeh hojíłʼı̨́įgo doo ákóhodooníił da ńtʼééʼ.