Abaisraeli bakaba batwire omu ihamba kumara emyaka nka 40. Bakaba baasingwire endembo nyingi. Kwonka, obu baateera orusiisira omu mpita za Moabu aha rubaju rw’oburugwa-izooba rw’Omugyera Yorudani, bakaba bari haihi kutaaha omu Nsi Eyaraganisiibwe. Balaki, omugabe wa Moabu, akatiina ngu akaba naija kufeerwa ihanga rye. N’ahabw’ekyo akatuma aha omushaija orikwetwa Balamu kuza Moabu kukyeena Abaisraeli.

Kwonka Yehova akagambira Balamu ati: ‘Otarikyeena Abaisraeli.’ N’ahabw’ekyo Balamu akanga kuzayo. Omugabe Balaki akagaruka yaamutumaho omurundi gwa kabiri kandi yaamuraganisa kumuha buri kimwe eki arikwenda. Kwonka, Balamu akanga kuzayo. Ruhanga akagira ati: ‘Noobaasa kugyenda, kwonka eki ndaakuragiire obe nikyo waagamba kyonka.’

Balamu akatemba aha ndogoya ye yaagyenda Moabu. Akaba ayeteekateekire kukyeena Abaisraeli, n’obu Yehova araabe yaabaire amuragiire kutakikora. Maraika wa Yehova akeemerera omu muhanda emirundi eshatu. Balamu akaba atarikubaasa kureeba maraika, kwonka endogoya yo ekaba neereeba maraika. Endogoya ekabanza kuruga omu muhanda yaatoora omu musiri. Bwanyima yaayemigiziriza aha rugo, yaamigiraho ekigyere kya Balamu. Ekyakuratsireho, ekabyama ahagati y’omuhanda. Aha mirundi egyo yoona, Balamu akaba ateera endogoya ye enkoni.

Bwanyima, aha murundi gwa kashatu, Yehova akareetera endogoya kugamba. Endogoya ekabuuza Balamu eti: ‘Ahabw’enki waaguma noonteera?’ Balamu akagarukamu ati: ‘Naakutura okungaya. Kuri naaba nyine rurara omu ngaro, naaba niinkwita.’ Endogoya ekagira eti: ‘Otwire noontemba kumara emyaka mingi. Hariho obu ndakugizire nti?’

Bwanyima Yehova akareetera Balamu kureeba maraika. Maraika akagira ati: ‘Yehova akurabwire ngu otarikyeena Abaisraeli.’ Balamu akagira ati: ‘Nkozire ekitahikire. Naaza kugarukayo.’ Kwonka maraika  akamugira ati: ‘Noobaasa kugyenda Moabu, kwonka ekigambo eki ndaakugambire obe nikyo waagamba.’

Mbwenu shi Balamu akeega eishomo? Ngaaha. Bwanyima y’ekyo, Balamu akateeraho kukyeena Abaisraeli emirundi eshatu, kwonka buri murundi, Yehova akaba amureetera kubaha emigisha. Ekyarugiremu, Abaisraeli bakatahirira Moabu, kandi Balamu akaitwa. Mbwenu shi kikaba kitarikwija kuba kirungi Balamu ku yaahurikiriize Yehova?