ƐZUKOALƐDEƐ 28
Beelam Asoaso Ne Dendɛle
Yizilayɛma lile asɛɛ ɛvolɛ 40 wɔ fienemgbole ne anu. Ɛnee bɛli azuamgbole dɔɔnwo anwo zo konim. Akee bɛradwule Mowabe azɛlɛ fɛɛnye ne mɔɔ wɔ Azule Dwɔdan ne aduduleɛ la azo, na ɛnee mekɛ ɛdwu kɛ bɛkɔ Ɛwɔkɛ Azɛlɛ ne azo. Mowabe belemgbunli Beelake ahonle dule kɛ wɔannea a Yizilayɛma bava ye azɛlɛ ne. Yemɔti ɔdole ɛsalɛ ɔvɛlɛle nrenyia bie mɔɔ bɛfɛlɛ ye Beelam la kɛ ɔrɛla Mowabe ɔrawa Yizilayɛma amonle.
Noko Gyihova hanle hilele Beelam kɛ: ‘Mmawa Yizilayɛma amonle.’ Yemɔti Beelam angɔ. Belemgbunli Beelake dole ɛsalɛ vɛlɛle ye bieko na ɔbɔle ye ɛwɔkɛ kɛ debie biala mɔɔ ɔkpondɛ la, ɔbava yeamaa ye. Noko Beelam angɔ. Akee Nyamenle hanle kɛ: “Ɛ nee menli ne ɛhɔ, na mɔɔ menwɔha menwɔhile wɔ la, yemɔ ala a ka a.”
Beelam vole ye asoaso ne azo kɛ ɔkɔ Mowabe. Ɔyɛle ye adwenle kɛ ɔkawa Yizilayɛma amonle ɔnva nwo kɛ Gyihova hanle hilele ye kɛ ɔmmayɛ zɔ la. Gyihova anwumabɔvolɛ vindele adenle ne anu fane nsa. Beelam annwu anwumabɔvolɛ ne, noko ye asoaso ne nwunle ye. Mɔɔ limoa la, asoaso ne bɔle ɔ ti kpɔkɛ nu. Fane nwiɔ ne azo, asoaso ne hɔluale bane ne anwo kpalɛ na ɔmianle Beelam agyakɛ wɔ bane ne anwo. Mɔɔ li awieleɛ la, asoaso ne butule adenle ne anu. Wɔ ko biala anu, Beelam fa ye baka ne fi asoaso ne.
Fane nsa ne anzi, Gyihova maanle asoaso ne dendɛle. Asoaso ne bizale Beelam kɛ: ‘Duzu ati a wɔfi me fane nsa ɛhye a?’ Beelam hanle kɛ: “Ɔboalekɛ wɔyɛ me koasea! Saa melɛ dadeɛ a anrɛɛ mehu wɔ.” Asoaso ne hanle kɛ: ‘Sumunli wɔ ɛbɛlabɔlɛ nu wɔdɛnla me nwo zo too. Asoo meyɛ wɔ zɛhae ɛlɛ?’
Akee Gyihova maanle Beelam nwunle anwumabɔvolɛ ne. Anwumabɔvolɛ ne hanle kɛ: ‘Se Gyihova bɔle wɔ kɔkɔ kɛ ɛmmawa Yizilayɛma amonle.’ Beelam hanle kɛ: ‘Meyɛ ɛtane. Mesia meahɔ sua nu.’ Noko anwumabɔvolɛ ne hanle kɛ: ‘Ɛ nee menli ne ɛhɔ, na mɔɔ Gyihova baha ahile wɔ la, yemɔ ala a ka a.’
Asoo Beelam zukoale debie vile edwɛkɛ ne anu? Kyɛkyɛ. Yemɔ anzi, Beelam bɔle mɔdenle kɛ ɔwa Yizilayɛma amonle fane nsa, noko Gyihova maanle biala hakyile yɛle nyilalɛ. Awieleɛ bɔkɔɔ ne, Yizilayɛma hɔtetale Mowabe na bɛhunle Beelam. Saa Beelam diele Gyihova a, asoo anrɛɛ bɛbahu ye ɔ?
“Bɛmaa bɛ nye ɛla ɛkɛ na bɛnlea bɛ nwo boɛ wɔ anyebolo biala anwo, ɔluakɛ saa sonla nyia ɔ nwo bɔbɔ a, ye ninyɛne ne ɛnrɛhola ɛnrɛmaa ye ngoane.”—Luku 12:15
