Ngalngali 40 ya taon lan walad kalawakan iray Israelita. Dakel lay asakop dan mabiskeg ya syudad. Natan et wala la rad dalin na Moab, diad bukig na Ilog Jordan, tan kaukolan la ran onloob ed samay dalin ya im-promise nen Jehova ed sikara, say Insipan a Dalin. Natatakot si Balak ya ari na Moab ompan sakopen da la ra. Kanian impatawag toy laki ya say ngaran to et Balaam pian isumpa iray Israelita.

Balet imbaga nen Jehova ed si Balaam: ‘Agmo isusumpa iray Israelita.’ Kanian aglabay nen Balaam so onlad Moab. Balet impatawag lamet nen Arin Balak tan im-promise to ya iter toy amin ya labay nen Balaam. Agnin siansia linma si Balaam. Insan imbaga na Dios: ‘Nayari kan onla, balet say ibagam labat et no antoy ibagak ed sika.’

Kanian linmugan si Balaam ed asno to tan linmad Moab. Balet nononoten to ya isumpa iray Israelita, anggano imbaga la nen Jehova ya agto ra isusumpa. Amitlon nampanengneng so anghel nen Jehova diad dalan. Agnanengneng nen Balaam so anghel, balet nanenengneng na asno to. Nen unona, inmiwas ed dalan so asno tan diad alog so inarap to, kanian pinekpek nen Balaam na baston to. Nen komadua, ginmilig so asno ed padir tan apildit so sali nen Balaam, kanian pinekpek to lamet. Nen komatlo, dinmukol ed pegley na dalan so asno kanian pinekpek lamet nen Balaam.

Diad samay komatlo, pinansalita nen Jehova so asno. Tinepetan na asno si Balaam: ‘Akin et pekpek ka lan pekpek ed siak?’ Imbaga nen Balaam: ‘Panon to ey ta lolokoen mo ak. No wala labat so espadak, pinatey ta ka la.’ Imbaga na asno: ‘Pigay taon mo ak lan luluganan. Akin, ginawak la yad sika dati?’

Diad saman, nampanengneng la so anghel ed si Balaam. Imbaga na anghel: ‘Imbaga lad sika nen Jehova ya agmo isusumpa so Israel.’ Say kuan nen Balaam: ‘Aliway ginawak. Onsempet ak la.’ Balet  imbaga na anghel: ‘Nayari kan onlad Moab, balet say ibagam et no anto labat so ibaga nen Jehova ed sika.’

Kasin unoren la natan nen Balaam si Jehova? Andi. Kasabi tod Moab, amitlo ton sinali ya isumpa iray Israelita, balet kada mansalita, say ompaway ed sangi to et bendisyon, ta atan so inyan nen Jehova ed sangi to. Nen nilusob na saray Israelita so Moab, inatey si Balaam. Agkomon inatey si Balaam no inunor toy Jehova, awa?