De Israeliten wieren nu aul meist 40 Joa en de Wiltnis. Dee hauden aul väl Städa enjenomen. Nu wieren dee opp de moabitische Stap, oosten vom Jordan-Riefa, un wudden boolt en daut vesproakne Launt nengonen. Balak, de Kjennich von Moab, haud Angst, de Israeliten wudden sien Launt fuatnämen. Doawäajen kroagd dee eenen Maun no Moab, waut Bieleam heet. Dee sull de Israeliten schlajchtet wenschen.

Oba Jehova säd to Bieleam: “Du saust de Israeliten nich schlajchtet wenschen.” Doawäajen wull Bieleam nich gonen. De Kjennich Balak kroagd dän noch eemol un säd, hee wudd am aules jäwen, waut am jankad. Bieleam deed daut doawäajen nich. Dan säd Gott: “Du kaust gonen, oba du saust bloos daut sajen, waut ekj die saj.”

Bieleam reisd opp sienen Äsel no Sieden opptoo, no Moab. Dee wull de Israeliten schlajchtet wenschen, wan Jehova uk jesajcht haud, hee sull nich. Hinjawäajes leet Jehova sien Enjel sikj dree Mol seenen. Bieleam kunn dän Enjel nich seenen, oba de Äsel jo. Bie daut ieeschte Mol jinkj de Äsel vom Wajch rauf oppe Stap nopp. Daut tweede Mol jinkj dee soo dicht bie eenen Steenatun, daut Bieleam sien Foot doa tweschen kjeem. Daut latste Mol läd de Äsel sikj medden oppem Wajch dol. Jiedatsmol vekjield Bieleam dän met eenen Stock.

No daut dredde Mol muak Jehova daut soo, daut de Äsel räden kunn. De Äsel fruach Bieleam: “Wuarom vekjielst du mie emma wada?” Bieleam säd: “Ekj mott mie wäajen die schämen. Ekj wudd die dootmoaken, wan ekj een Schwieet haud.” De Äsel säd: “Du hast aul Joaren opp mie jeräden. Hab ekj mie mol ea soo oppjestalt?”

Dan leet Jehova Bieleam dän Enjel seenen. De Enjel säd: “Jehova säd je, du sust Israel nich schlajchtet wenschen.” Bieleam säd: “Ekj hab waut schlajchtet jedonen. Ekj woa trigj no Hus gonen.” Oba de  Enjel säd: “Du kaust no Moab gonen, oba du saust bloos daut sajen, waut Jehova die sajcht.”

Haud Bieleam daut nu vestonen? Nä. Dee wull Israel dree Mol schlajchtet wenschen. Oba Jehova deed daut soo, daut Bieleam dee jiedatsmol goodet wenschen must. Lota deeden de Israeliten jäajen Moab feiten un Bieleam wort dootjemoakt. Wudd daut nich sennen bäta jewast, wan Bieleam von fuaz aun Jehova jehorcht haud?