Israel runakunaqa 40 watañam chunniqpi yacharqaku hinaspapas Diospa qunan allpamanñam chayachkarqaku. Paykunaqa hatun llaqtakunata atiparuspankum, Moab nacionpa hichpanpiña kachkarqaku. Chaymi Moab nacionta kamachiq Balacqa llumpayta mancharikuspan Balaam sutiyuq runata nirqa Israel runakunata ñakamunanpaq.

Jehova Diosmi ichaqa Balaamta nirqa: “Amam Israel runakunataqa ñakankichu”, nispa. Chaymi payqa Moab nacionman mana rirqachu. Kamachiq Balacqa kaqmantam Balaamta qayachirqa: “Ñakamuptikiqa tukuy mañakusqaykitam qusqayki”, nispa. Chaywanpas Balaamqa manam kasurqachu. Diosñataqmi Balaamta nirqa: “Riruyá, ichaqa ñuqapa rimapayasqallaytam ninki”, nispa.

Balaanmi ichaqa Diosta mana kasukuspan Israel runakunata ñakananpaq asnonpi Moab nacionman rirqa. Hinaptinmi risqan ñanpi Diospa angelnin kimsa kutikama rikuriykurqa. Balaamqa manam angeltaqa rikurqachu, asnonmi ichaqa rikuruspan chakra ukuman muyururqa. Kaqmanta rikuruspam asnoqa pirqa kuchuman Balaampa chakinta ñitirurqa, chaymantañataqmi ñanpi laqakururqa. Balaamñataqmi llumpayta kaspiwan maqaparqa.

Hinaptinmi Diosqa asnota rimarachirqa, chay asnom Balaamta tapurqa: “¿Imanasqataq maqawanki?”, nispa. Balaamñataqmi nirqa: “Manam upachu kani, espaday makiypi kaptinqa kunallanmi wañurachikiman”, nispa. Asnoñataqmi nirqa: “Unay watañam sillakuwanki, manam haykapipas kaynataqa ruwarqaykichu”, nispa.

Chaymi Balaanman Diosqa angelninta rikuriykachirqa. Angelmi nirqa: “Jehova Diosqa nisurqankiñam Israel runakunata ama ñakanaykipaq”, nispa. Balaamñataqmi nirqa: “Pantarullanim, kunanqa wasiymanñam kutikusaq”, nispa. Angelmi ichaqa nirqa: “Moab nacionmanqa riwaqmi, ichaqa Jehova Diospa nisusqallaykitam ninki”, nispa.

 Chaywanpas, ¿kasukurqachu Balaamqa? Manam. Aswanmi kimsa kutikama Israel runakunata ñakayta munarqa. Diosmi ichaqa kimsa kutikama Israel runakunapa allinninkupaq Balaanwan nichirqa. Chaynapim Israel runakunaqa Moabta atiparurqaku, chaypim Balaampas wañurqa. Jehova Diosta kasukuspanqa manam wañunmanchu karqa.