Israel runakunaqa 40 watañan ch’inneqpi purisharanku. Askha llaqtakunatañan atiparanku. Kunantaq Moab llaqtaq qayllanpi kasharanku, pisillaña faltasharan Diospa prometesqan allpaman jaykunankupaq. Moab llaqtaq reynin Balacmi manchakuran allpanta Israel runakuna qechunanmanta. Jinan Balaamta valekuran Moabman jamuspa Israel runakunata ñakananpaq.

Jehová Diosmi ichaqa Balaamta niran: “Aman Israel runakunataqa ñakankichu”, nispa. Chaymi Balaamqa Moabman mana riyta munaranchu. Jinan rey Balacqa jujmanta valekuran, nirantaq: “Ima munasqaykita qosayki”, nispa. Balaammi ichaqa mana kasuranchu. Jinan Diosqa Balaamta niran: “Riwaqmi, ichaqa imachus nisqallaytan rimanki”, nispa.

Chaymi Balaamqa china asnonpi Moabman riran. Payqa munaranpunin Israel runakunata ñakayta, Diosña mana munaranchu chay ruwananta chaypas. Chaymi Diospa angelninqa kinsa kutita purisqan ñanpi rijuriran. Balaamqa manan rikuranchu angelta asnonmi ichaqa rikuran. Chaymi asnoqa angelmanta ayqekunanpaq ñanmanta lloqsiran. Chaymantataq Balaampa chakinta rumi perqaman ñit’iran. Ultimotataq asnoqa ñanpi thallarpariran. Chaykaman Balaamqa asnonta k’aspiwan maqaran.

Chayllamanmi Jehová Diosqa asnota rimachiran. Jinan asnoqa Balaamta niran: “¿Imaraykun maqawanki?”, nispa. Balaamtaq niran: “Noqamantan burlakuwashanki. Cuchillollay kashanman chayqa, wañurachiykimanmi”, nispa. Asnotaq niran: “Unayñan sillakuwanki, ¿jayk’aqllapas kayta ruwaraykichu?”, nispa.

Chay qhepamanmi Balaamqa angelta rikuran. Angelmi niran: “Jehová Diosmi nirasunki Israelta ama ñakanaykipaq”, nispa. Balaamtaq niran: “Pantanin kayta ruwaspay, wasiyman kutipusaq”,  nispa. Angelmi ichaqa niran: “Rillay Moabta, ichaqa Diospa nisqallantan rimanki”, nispa.

¿Kasukuranchu Diosta? Manan, aswanpas kinsa kutipin Israel llaqtata ñakayta munaran. Diosmi ichaqa ñakasqanta bendicionman tukuchiran. Chay qhepamanmi Israel llaqtaqa Moab runakunata wañuchispa Balaamtapas wañuchiranku. Sichus qallariymantapacha Diosta kasukunman karan chayqa manan wañunmanchu karan ¿riki?