O Izraelcija sine okolu 40 berša ki pustina. Ola osvojngje but dizja. Akana, keda sine ko Moav istočno tari reka Jordan, alo o vreme te khuven ki Vetimi phuv. O Valak, o cari taro Moav, darandilo kaj o Izraelcija ka len leskiri phuv. Adaleske vikingja jekhe manuše so vikinela pe sine Valaam te avel ko Moav hem te del arman e Izraelcon.

Ama, o Jehova vakergja e Valaameske: „Na smejnea te de arman e Izraelcon“. Adaleske o Valaam na manglja te džal. O cari, o Valak, palem vikingja le, ama akava puti vetingja kaj ka del le sa so mangela. Ama, o Valaam palem odbingja. Tegani o Devel vakergja leske: „Šaj te dža, ama ka vakere adava me so ka vakerav tuke“.

O Valaam uklilo ki herni hem cidingja te džal ko Moav. Ov rešingja te del arman e Izraelcon iako o Jehova vakergja leske te na kerel adava. E Jehovaskoro angeli pojavingja pe ko drumo trin puti. O Valaam našti sine te dikhel le ama i herni šaj sine. O prvo puti, i herni manglja te našel hem počmingja te džal ki jekh niva. Palo adava, lepingja pe ko zido hem stegingja o pro e Valaameskoro. Ko krajo, i herni pašlili maškaro drumo. Sekova puti keda i herni na mangela sine te džal, o Valaam marela la sine kaštea.

Palo trito puti, o Jehova kergja i herni te šaj te kerel lafi. Oj pučlja e Valaame: „Soske doborom marea man?“ O Valaam odgovoringja lake: „Kerea man delino! Te ovel man sine mači dži akana ka mudarav tut sine“. I herni vakergja: „But berša služinava tuke. Dali nekogaš kergjum tuke nešto asavko?“

Tegani o Jehova kergja te šaj o Valaam da te dikhel e angele. O angeli phengja: „O Jehova vakergja tuke te na de arman e Izraelcon“. O Valaam vakergja: „Grešingjum. Ka irana man khere“. Ama, o angeli vakergja leske: „Šaj te dža ko Moav ama te vakere adava so ka vakerel tuke o Jehova“.

 Dali o Valaam siklilo nešto taro adava so ulo leske? Na. Palo adava, o Valaam manglja trin puti te del arman e Izraelcon. Ama, o Jehova, o sotrin puti leskere lafija kerela len sine te oven blagoslov. Ko krajo, o Izraelcija napadingje o Moav hem o Valaam sine mudardo. So mislinea, nane li te ovel sine pošukar o Valaam te šunel e Jehova?