O Izraelcija hine skoro 40 berš ki pustinja. On osvojindže but dizja. Akana, ked hine ko Moav istočno andi reka Jordan, alo o vreme te khuven ki Obećimi phuv. O Valak, o kralj ando Moav, darandilo so o Izraelcija ka ljen oljesi phuv. Odoljese vičindža jekhe manuše kova vičindža pe Valam te avel ko Moav hem te del arman e Izraelcendže.

Ama, o Jehova phendža e Valamese: „Na ismineja te de arman e Izraelcendže.“ Odoljese o Valam na manglja te džal. O kralj, o Valak, paljem vičindža lje, ama akava puti obećindža so ka del lje sa so mangela. Ama, o Valam paljem odbindža te džal. Tegani, o Devel phendža ljese: „Šaj te dža, ama ka vačere samo odova so me ka vačerav tuče.“

O Valam ukljindža ki herni hem podžindža ko Moav. Ov manglja te del arman e Izraelcendže, iako o Jehova phendža ljese te na čerel odova. E Jehovaso anđeo pojavindža pe ko drumo trin putija. O Valam naštindža te dikhel lje, ama i herni dikhlja lje. O prvo puti, i herni manglja te našel hem počmindža te džal ki jekh njiva. Palo odova, lepindža pe ko zido hem stegindža e Valameso pro. Ko krajo, i herni pašljilji maškaro drumo. Svako puti ked i herni na manglja te džal, o Valam mardža la kašteja.

Palo trito puti, o Jehova čerdža i herni te vačeri. Oj pučlja e Valame: „Sose odobor mareja man?“ O Valam odgovorindža lače: „Čereja man diljino! Te ovel man mač dži akana hine ka mudarav tut.“ I herni phendža: „But berša služinava tuče. Da li nekad čerdžum tuče diso adžahar?“

Tegani, o Jehova čerdža hem o Valam te dikhel e anđele. O anđeo phendža: „O Jehova phendža tuče te na de arman e Izraelcendže.“ O Valam phendža: „Grešindžum. Ka irinav man  čhere.“ Ama, o anđeo phendža ljese: „Šaj te dža ko Moav, ama vačer odova so ka phenel tuče o Jehova.“

Da li o Valam sikljilo diso ando odova so ulo ljese? Na. Palo odova, o Valam manglja trin putija te del arman e Izraelcendže. Ama, o Jehova, o sotrin putija čerdža oljese lafija te oven blagoslov. Ko krajo, o Izraelcija napadindže o Moav hem o Valam hine mudardo. Ked bi o Valam kotar početko šunela e Jehova, ov na bi merela.