Израильтяноря ԥирэнас па пустыня варикай 40 бэрш. Вонэ захутилдэ барэ фороря. Акана вонэ стодэ катуны пэ мал Моаво, паша лэн Иордано. Поджыля время тэ пэрэжан пэ ԥув, сави авэла лэнди. О царё Валако анда Моаво пэрэдарайля, кай израильтяноря залэна лэсти ԥув. Во ақардя лэ Валаамос, кай тэ авэл андо Моаво и тэ дэл амрая лэ израильтянонэн.

Но о Иегова ԥэндя лэ Валаамости: «На дэ амрая лэ израильтянонэн». И о Валаамо на жыля интя. Дуйто разо о царё Валако ақардя лэ Валаамос и ԥэндя, кай дэла лэсти вся, со во закамэла. О Валаамо упалэ на жыля. Тоди о Иегова ԥэндя: «Жа, но ԥэн кати, со мэ тути ԥэнава».

О Валаамо бэшля пэ ишачка и лагля андо Моаво. Хоть о Иегова и приԥэндя лэ Валаамости тэ на дэл амрая, во всаек закамля кадя тэ стерэл. Лэ Иеговаско анӷело тривар тердёлас лэстэ по дром, кай тэ на мэкэл лэс. Пэрво разо ишачка додиқля лэ анӷелос вой банделя андэ авэр риг и жыля андэ мал. О Валаамо на диқэлас лэ анӷелос, ай ишачка диқэлас лэс. Дуйто разо, кала вой додиқля лэ анӷелос, вой фартэ пашэля каринг и баруни стина, кай аж притасадя о пэрно лэ Валаамости. Ай трито разо, кала вой пэля по машкар дром. Кажно разо о Валаамо ла рувляса марэлас ла.

И акэ о Иегова стердя, кай ишачка тэ задэл дума. Вой пушля: «Васо ту ман марэс?» О Валаамо ԥэндя: «Мэ, сар дилоро дицював через тутэ. Тэ авелоп мандэ о мечо, мэ тут умардоп!» И ишачка ԥэндя: «Мэ хоть еқвар кадя теравас? Мэ тут ԥиравав бут бэрша».

Тоди о Иегова ԥэрнадя и яқа лэ Валаамости, кай тэ диқэл лэ анӷелос. О анӷело ԥэндя: «О Иегова же приԥэндя тэ на дэс амрая лэ израильтянонэн». О Валаамо ԥэндя: «Важ кода кай мэ тердэм найдраго, мэ рисавава цэрэ». Но о анӷело ԥэндя: «Камэс, жа андо Моаво, но ԥэнэса кати, со тути ԥэнэна о Иегова».

 Сытеля о Валаамо варисости анда кода, со лэса сас? Най. После када о Валаамо тривар камэлас тэ дэл амрая лэ израильтянонэн. Но о Иегова кажно разо терэлас, кай о Валаамо тэ на дэл амрая, ай тэ блаӷословий лэн. Израильтяноря захутилдэ о Моаво и умардэ лэ Валаамос. Тэ канглоп о Валаамо май англал лэ Иеговас, во на мулиноп.