Aisraeli akhala n’thando mu pyaka 40. Iwo akunda mizinda mizinji yakuwanga. Mudafika iwo ku thando ya Moabu mbamanga misasa n’khundu mwa Nkulo wa Yordane, ukhali ndzidzi toera kupita mu Dziko Yakupikirwa. Bhalaki, mambo wa Moabu, akhagopa kukwatirwa dziko yace na Aisraeli. Natenepa, aphemba mamuna akhacemerwa Bhalaamu toera abwere ku Moabu, pontho apase dzedze Aisraeli.

Mbwenye Yahova apanga Bhalaamu: ‘Leka kupasa dzedze Aisraeli.’ Natenepa, Bhalaamu akhonda kuenda. Mambo Bhalaki am’phemba kaciwiri mbapikira kuti anampasa pyonsene pinafuna iye. Bhalaamu apitiriza kukhonda. Buluka penepo, Mulungu ampanga: ‘Ndoko, mbwenye basi ene unadzalonga pinakupanga ine toera kulonga.’

Bhalaamu akwira buru yace mbaenda kubangwe kwa Moabu. Iye akhafuna kupasa dzedze Aisraeli, ngakhale Yahova ampanga toera akhonde kucita pyenepi. Anju wa Yahova aonekera mu nseu m’maulendo matatu. Bhalaamu nee akhakwanisa kuona anju, mbwenye buru yace ikhaona. Pakutoma, buru yapambuka mbipita m’munda. Buluka penepo, buru yaenda n’khundu mwa mwala mbipfinyira mwendo wa Bhalaamu pa mwala. Pakumalisa, buru yagodama pakati pa nseu. Mukhacitika pyenepi Bhalaamu akhamenya buru na ndodo yace.

Natenepa, Yahova acitisa buru kulonga. Buru yabvundza Bhalaamu: ‘Thangwi yanji mukupitiriza kundimenya?’ Bhalaamu atawira: ‘Thangwi wandinyoza, mbandidakhala na supada mbandidakupha.’ Buru yalonga: ‘Imwe mwandikwira mu pyaka pizinji. Ndakucitirani kale pyenepi?’

Buluka penepo, Yahova acitisa Bhalaamu kuona anju. Anju alonga: ‘Yahova akhadakucenjeza kuti uleke kupasa dzedze Israeli.’ Bhalaamu atawira: ‘Ndadawa. Ndinabwerera kunyumba.’ Mbwenye anju alonga:  ‘Ndoko ku Moabu, mbwenye basi ene unadzalonga pinakupanga Yahova toera kulonga.’

Kodi Bhalaamu abvera pidapangwa iye? Nkhabe. Iye ayesera katatu kuenda kapasa dzedze Israeli, mbwenye m’maulendo onsene Yahova acitisa kuti iye apase nkhombo mbuto mwa dzedze. Pakumalisira, Aisraeli akunda Moabu, pontho Bhalaamu aphiwa. Kodi nee mbapidakhala pyadidi kuna Bhalaamu kubvera Yahova pakutoma?