Israeelete manni halalla 40 meddi yaanno diro keeshshino. Insa lowota jajjabba katamma qeelte adhitino. Hakkiinni insa Moaabi xawira dunkaana qasidhe heedhino; Moaabi Yordaanoosi Lagira soojjaatoonni noo xawooti. Hatte yannara Israeelete manni Hexxote Gobba eara rahe no. Moaabi moote Baalaaqi Israeelete manni gobbaˈya gudise adhanno yee yaadino. Konni daafira, isi Beleaami yinanni manchi Moaabi gobba daye Israeelete manna rumanno gede woshshiˈri.

Yihowa Beleaami, ‘Israeelete manna runtooti’ yiisi. Konni daafira, Beleaami Moaabi gobba haˈra giwi. Moote Baalaaqi layinkimeeshsho Beleaami woshshiˈri; isi ‘Yiittore baala eemmohe’ yiisi. Beleaami kayinni xaano haˈra giwi. Hakkiinni Maganu togo yiisi: ‘Haˈrate woyite haˈrina, haˈrittoro kayinni ani yeemmohere calla assi.’

Beleaami harricho gulufe Moaabi gobba haˈrara fuli. Yihowa Israeelete manna runtooti yiinosiha ikkirono, isi kayinni insa rumara hedino. Yihowa sokkaasinchi sase hige albasiinni uurri. Beleaami Maganu sokkaasincho dilaino; harrichosi kayinni laˈino. Umo, harricho doogotenni wirri yite gatira eˈu. Hakkiinni, harricho kinchu huxxiwa gamba yite, Beleaami lekka huxxu ledo xaadisse uurritu. Jeefote harricho doogote mereero ubbe gibbu. Sasente yannara, Beleaami harricho dullunni ganinose.

Hakkunni gedensaanni Yihowa harricho coyidhanno gede assi. Harricho Beleaami, ‘Ma asseennaheeti togo assite gantanni noottoehu?’ yite xaˈmitu. Beleaami togo yee qoli: ‘Godoˈloottae daafiraati. Angaˈya bise heedhoommero darganko qocci asse agureemmohehu gatino.’ Hakkiinni harricho togo yitu: “Techo geeshsha diguluffannae noomma? Konni albaanni togo ikke egennoommani?”

Hakkiinni Yihowa Beleaami sokkaasincho laˈˈanno gede assi. Sokkaasinchu Beleaami ‘Yihowa Israeele runtooti yiinohe’ yiisi. Beleaami togo yee qoli: ‘Cubbo loosoommo. Xa qaeˈya agure  higeemmo.’ Sokkaasinchu kayinni togo yiisi: ‘Moaabi gobba haˈra dandaatto; kayinni Yihowa kulannohere calla coyiˈri.’

Beleaami seejjo macciishshiyya? Dimacciishshino. Isi Israeelete manna rumate sase hige hedino; Yihowa kayinni sasente yannara Israeelete manna maassiˈranno gede assino. Gedensaanni Israeelete manni Moaabi gobba qeeli; Beleaamino shini. Beleaami umonni Yihowa yiinosire assoommero woyyannoha dilawannohe?