Ema-Israyeli ahlala ehlane iminyaka lecishe ibe ngu-40. Abencobe emadolobha lamanyenti. Manje, ngemva kwekuhlala ehlane lakaMowabi ngesheya kweJordane, besekusikhatsi sekutsi angene eVeni Lesetsembiso. Bhalakhi iNkhosi yakaMowabi bekesaba kutsi ema-Israyeli atawutsatsa live lakhe. Ngako-ke, wacela lenye indvodza lokutsiwa nguBhalamu kutsi ite kaMowabi itewucalekisa ema-Israyeli.

Jehova watsi kuBhalamu: ‘Ungawacalekisi ema-Israyeli.’ Bhalamu wabese akasayi. INkhosi Bhalaki yaphindze yamcela futsi yetsembisa kumnika konkhe lakufunako. Nalapho Bhalamu wala. Nkulunkulu watsi: ‘Ungahamba nawo, kodvwa utawukhuluma kuphela loko lengitakutjela kona.’

Bhalamu wagibela imbongolo yakhe waya kaMowabi. Wabese ukhetsa kuwacalekisa ema-Israyeli nanobe Jehova abetsite angakwenti loko. Ingilosi yaJehova yetama kumvimba emgwacweni tikhatsi letintsatfu. Bhalamu abengayiboni lengilosi kodvwa lembongolo yakhe beyiyibona. Kwekucala, lembongolo yaphuma emgwacweni, yagudla lubondza yampintjetela lunyawo lwaBhalamu kulo. Ekugcineni lembongolo yalala phasi ekhatsi emgwacweni. Bhalamu wayishaya ngendvuku yakhe.

Ngemva kwekuyishaya katsatfu, Jehova wenta lembongolo yakhuluma. Lembongolo yabuta Bhalamu yatsi: ‘Ngikwenteni kutsi ungaze ungishaye letikhatsi letintsatfu?’ Bhalamu watsi: ‘Kungobe ungente silima. Kube nje bengiphetse inkemba, bengitakubulala.’ Lembongolo yatsi: ‘Angisiyo yini imbongolo yakho lebewusolo uyigibela kuphila kwakho konkhe? Ngike ngakuphatsa yini ngalendlela ngaphambili?’

Jehova wase wenta Bhalamu wayibona lengilosi. Lengilosi yatsi: ‘Ngitokuvimba, ngobe loluhambo lwakho luphambene nentsandvo yaJehova.’ Bhalamu watsi: ‘Nangabe-ke loluhambo lwami lungasiluhle  kuwe, ngitawubuyela emuva.’ Kodvwa lengilosi yatsi: ‘Hamba nalamadvodza, kodvwa utawukhuluma kuphela loko lengitakutjela kona.’

Wasifundza yini sifundvo Bhalamu? Cha. Ngemva kwaloko Bhalamu wetama kucalekisa ema-Israyeli tikhatsi letintsatfu, kodvwa sikhatsi ngasinye nakawacalekisa Jehova bekamenta awabusise. Ngemva kwesikhatsi, ema-Israyeli ahlasela bakaMowabi futsi Bhalamu wabulawa. Abetawusindza yini Bhalamu kube abelalele Jehova?