Ho ne ho se ho fetile lilemo tse ka bang 40 Baiseraele ba ntse ba le lehoatateng. Ba ne ba hlotse metse e mengata e matla. Joale ba ne ba le lithoteng tsa Moabe ka bochabela ho Noka ea Jordane ’me ba le mothating oa ho kena Naheng e Tšepisitsoeng. Morena oa Moabe ea bitsoang Balake o ne a tšohile hore ba tl’o hapa naha ea hae. Kahoo, a kopa monna e mong ea bitsoang Balame hore a tle Moabe ho tla rohaka Baiseraele.

Empa Jehova a re ho Balame: ‘U se ke oa rohaka Baiseraele.’ Kahoo, Balame a hana ho ea. Morena Balake a boela a mo kopa hore a tle ’me lekhetlong lena a mo tšepisa ho mo fa ntho leha e le efe eo a e batlang. Empa Balame a ’na a hana. Eaba Molimo o re: ‘Tsamaea, empa u bue feela seo ke tla u bolella sona.’

Balame a palama tonki ea hae ’me a leba Moabe e ka boroa. O ne a ikemiselitse ho rohaka Baiseraele, le hoja Jehova a ne a mo boleletse hore a se ke a etsa joalo. Ha a le tseleng, lengeloi la Jehova la hlaha ka makhetlo a mararo. Balame o ne a sa le bone, empa tonki ea hae eona e ne e le bona. Qalong, tonki e ile ea kheloha tsela ea kena masimong. Ea ntan’o petelletsa leoto la Balame lerakong la majoe. Qetellong, ea lula fatše ka har’a tsela. Nako le nako, Balame o ne a e otla ka molamu.

Lekhetlong lena la boraro, Jehova o ile a etsa hore tonki eo e bue. Ea re ho Balame: ‘U nkotlela’ng?’ Balame a re: ‘U nketsa setlatla. Ke ne ke tla u bolaea hoja ebe ke na le sabole.’ Tonki ea re: ‘Ke khale u mpalama. Na ho na le mohla nkileng ka u etsa tjee?’

Eaba Jehova o etsa hore Balame a bone lengeloi. Lengeloi la re: ‘Jehova o u lemositse hore u se ke oa rohaka Iseraele.’ Balame a re: ‘Ke  fositse. Ke tla khutlela hae.’ Empa lengeloi la re: ‘U ka ea Moabe, empa u bue feela seo Jehova a reng u se bue.’

Na Balame o ile a mamela? Che. Balame o ile a leka ka makhetlo a mang a mararo ho rohaka Baiseraele, empa nako le nako Jehova a etsa hore a ba hlohonolofatse. Qetellong, Baiseraele ba ile ba hlasela Moabe ’me Balame a bolaoa. Na ho ne ho sa tl’o ba molemo hoja ebe Balame o ile a mamela Jehova li sa tloha feela?